Войти

Войти

Мииринэй куорат арҕаа өттүгэр бүтүн микрооройуон үөскүөҕэ.


Бу туһунан "Мииринэй муниципальнай вестнигэ" диэн мээрийэ таһаарыытыгар уонна саайтыгар,  сүрүннүүр архитектор Светлана Сафонова тутуу барылын  билиһиннэрбитинэн сирдэттим.
Куорат дьаһалтатын былаанынан, Өктөөп 50 сылын аатынан шоссе уонна "Рудник" оҕоруоччуттар кэмиэрчэскэйэ суох табаарыстыбаларын икки ардыларыгар, ол эбэтэр,  урукку "УС ЛЭПиП" сиригэр, бөдөҥ микрооройуон тутуллара былааннанар.


Тутуллуохтаах сир иэнэ добуочча киэҥ - 20,9 гектар.
Манна, барыта 126 дьиэ тутуллуохтаах.
Мантан үксэ - 97 дьиэ чааһынай ("индивидуальнай") тутуулар.


Бу - бастатан туран, үс уонна үстэн элбэх оҕолоох дьиэ кэргэттэргэ анаммыт туспа олбуордаах чааһынай дьиэлэр. Бэйэлэрэ оҕоруоттаах, тэпэлииссэлээх, гараажтаах буолаллара учуоттаммыт. Тутуу барыахтаах сиригэр, ойуура уонна ыарҕата ыраастанан, таас уонна буор дьапталыы кутуллан, дэхсилэнэн, учаастактар бэлэмнэр. Кылаабынайа, "Якутскэнерго" хампаанньа уот остуолбаларын тэниччи туруорталаан, элэктэриичистибэ күүрүүтэ тилэри баар. Дьиэлэр тутуллуохтаах дьоҕус оройуоннара куораттан чугас, биэрэстэ курдук сиргэ сытар. 2-с оптуобус аҕыйах хаамыылаах сиргэ тохтобуллаах.

IMG 20200926 WA0002
Куоракка сатыы сылдьыахха да сөп. Ол курдук, сатыы сылдьар дьоҥҥо аналлаах, соторутааҕыта кутуллубут бетон ыллыктаах. Тутуллуохтаах микрооройуон утары, куоракка саамай бөдөҥ "Андреевскай" атыы-эргиэн Киинэ баар. Кэккэлэһэ "Сибирские ресурсы" хампаанньа улахан эргиэн Киинин тута сылдьар. Мантан "Экспресс" аптекалаах супермаркет, "Коммунальщик" УК, баанньык, бөдөҥ автосервистар, гарааж кэпэрэтииптэрэ, алмааһы байытар үһүс баабырыка чугастар.
Онон дьиэ-уот турар сирэ чэрчилэнэн, тутуу барара эрэ хаалла. Мээрийэ ыыппыт тэрээһинин иитинэн, тутуллуохтаах микрооройуон уулуссаларыгар куорат олохтоохторунан ааттары бэрдэрбиттэрэ.
Куорат Сэбиэтэ манна Северная, Дачная, Светлая, Обогатителей уулуссалар баар буолууларын бигэргэттэ уонна докумуоҥҥа киллэрдэ. Манна үөскүөхтээх микрооройуон инфраструктурата күүскэ сайыннарыллыаҕа. Гаас, уу ситимэ киирэрэ былааннанар. Микрооройуоҥҥа хас да оҕо оонньуур былаһааккалара, ыччакка успуордунан дьарыктанарга аналлаах сирдэр эмиэ былааҥҥа киирдилэр.
Бу – куораты тутууга уонна тупсарыыга сүрдээх кэскиллээх былаан буоларын тоһоҕолоон бэлиэтиибин.
Былаан табылыннаҕына, инникитин маннык дьоҕус оройуоннар өссө эбии үөскүөхтэрэ диэн эрэл үөскүүр.

Станислав Алексеев. Мииринэй куората. Тутуллуохтаах микрооройуонтан ааптар хаартыскалара.

Тарҕат:

Добавить комментарий

Бүтэһик сонуннар