Светлэй бөһүөлэгэ 80-с сылларга үөскээбитэ.
Кини төрүттэниитэ уонна сайдыыта, Бүлүү ГЭС үһүс уочаратын (Светлэйдээҕи ГЭС) тутуутун уонна үлэтин кытары быһаччы ситимнээх. Манна сүрүннээн гидроэлектро-ыстаансыйаҕа уонна энэргиэтикэ ситимнэригэр эрэ сүрүн үлэ баар. 2005 сыллаахха Светлэй индустриальнай техникума тэриллэн, син балачча үлэ миэстэтэ бу орто анал үөрэх кыһатыгар тахсыбыта. Суоппартан саҕалаан дьиэ сууйааччытыгар уонна ас астааччыга тиийэ.
Эмиэ бу кэмнэргэ инбэлииттэри көрөр-истэр Киин тэриллибитэ. Син сэргэхсийии буолан испитэ. Аны урбаан сайдыан, бөһүөлэк оччугуйа бэрт.
Бөһүөлэк нэһилиэнньэтэ муҥутаан биэс тыһыынчаттан тахсаҕа тиийэ сылдьыбыта.
Уонча сыллааҕыттан бэттэх, чугас сытар тыа улуустарыттан, чуолаан Сунтаар улууһуттан Светлэйгэ дьон көһүүтэ баар буола сылдьыбыта. Билигин дьон Светлэйгэ кэлэринээҕэр Ньурбаҕа, Дьокуускайга, Покровскайга, Намҥа, Хатаска көһөрүн ордорор. Кыбартыыра атыылыыр уустук. Аҕыйах сыллааҕыта, дьиэ сыаната эмискэччи үрдүү сылдьыбыт буоллаҕына, билигин балаһыанньа хобдох.
Дьиэ сыаната сөҕүмэрдик чэпчээтэ.
Биир хостоох кыбартыыра - 250 тыһыынча солк. Үс хостоох "Арктика" тииптээх кыбартыыра - 500 тыһыынча солк.
Мииринэйгэ, бэл даачаны, итиннээҕэр ыарахан сыанаҕа атыылыыр дьон баар. Онон Светлэйгэ хамнастаах, үлэлээх гынан баран, дьиэтэ суох киһиэхэ, талар-сыымайдыыр түгэн тосхойдо. Хаартыскаҕа көрөргүт курдук, Светлэй-таас дьиэлэрдээх, күөххэ сууламмыт, куораттыы тииптээх бөһүөлэк. Бүлүү өрүһү кыйа барар хайа эниэтигэр сытар. Бөһүөлэк тулалыыр тыата сир аһынан баай: уулаах отон, клюква, моонньоҕон уонна сугун дэлэй.
Дьиктитэ диэн, манна Бүлүү өрүс хайаларыгар куртах бааһын эмтиир бөрө сиир ото үүнэр. Сүрдээх күүстээх уонна сэдэх эмп быһыытынан биллэр. Светлэйтэн Мииринэйгэ диэри 70 биэрэстэ. Күҥҥэ иккитэ улахан кэриэйскэй оптуобус сылдьар. Олус ыраас, чөкө бөһүөлэк. Өрүс чугас буолан, салгына ыраас, ойуур чугас. Туох да карьер-тайма суох буолан, чэбдик сир. Дьэ ол да буоллар, дьон бу бөһүөлэктэн тэскиллиэн баҕарар эбит.
Станислав Алексеев. Мииринэй куората. Ааптар фотота.
