Алтынньы 24 күнүнээҕи туругунан, Саха сиригэр эбии 177 киһи хоруона хамсыгар хабыллыбыта биллибит. Бу туһунан хамсыгы бохсор өрөспүүбүлүкэтээҕи суһал ыстаап иһитиннэрэр.
Ол курдук, Дьокуускайга - 98, Алдаҥҥа, Ньурбаҕа - 10-нуу, Аллайыахаҕа - 6, Намҥа, Уус Алдаҥҥа - 5-тии, Нерюнгрига, Сунтаарга, Мэҥэ Хаҥаласка, Хаҥаласка - 4-түү, Горнайга, Ленскэйгэ, Мииринэйгэ, Орто Халымаҕа уонна Тааттаҕа - 3-түү, Бүлүүгэ уонна Томпоҕо - 2-лии, Аммаҕа, Булуҥҥа, Дьааҥыга. Үөһээ Бүлүүгэ, Эдьигээҥҥэ, Уус Майдаҕа, Кэбээйигэ уонна Өлүөхүмэҕэ биирдии киһи ыалдьыбыттара бигэргэммит.
Хомойуох иһин, ааспыт суукка устатыгар икки киһи коронавирустан суох буолбут. Саха сирин лабораториялара 5851 анаалыһы чинчийбиттэр. Уопсайа хамсык саҕаланыаҕыттан 591277 тест оҥоһуллубут.
