Ньурба улууһугар баар Накыын баахта бөһүөлэгэр алтынньы 24 күнүгэр АЛРОСА хампаанньа үлэһитин өлүгэ көһүннэ. Бу туһунан хампаанньа пресс-сулууспата иһитиннэрэр.
“Тастан омос көрүүгэ өлүк ыалдьыбыта дуу, кырбаммыта дуу көстүбэт”, - диэн суруйбуттар. Быһылаан тахсыбытын туһунан диспиэччэргэ сарсыарда 07.45 мүн. иһитиннэрбиттэр. Өлбүт М.А. Жапалов капитальнай тутуу управлениетыгар электромонтажник-наладчигынан үлэлии сылдьыбыт. 32 саастаах эр киһи ити иннинэ ыалдьарын эҥин туһунан этэн медиктэргэ көрдөрүммэтэх. Баахтаҕа кэлиэн иннинэ, иирдэбил быһыытынан обсерваторга сыппыт, коронавируска туттарбыт анаалыстара барыта “отрицательнай” диэн көрдөрбүт. Баахта кэмигэр медиктэр кэтээн көрөн баран, туох да ыарыы сибикитин булбатахтар, туруга этэҥҥэ эбит. Билигин ис дьыала уорганнарын үлэһиттэрэ силиэстийэни ыыталлар. Эспиэрдэр эр киһи туохтан чопчу өлбүтүн быһаарыахтара.
