Саха сиригэр эмп тиийбэт кэккэ улуустарыгар эрэгийиэннээҕи доруобуйа харыстабылын министиэристибэтин резервнэй пуондуттан ылан эбии эмтэринэн хааччыйыахтара. Бу туһунан хоруона хамсыгын бохсор Суһал ыстаап салайааччытын солбуйааччы Ольга Балабкина брифинг кэмигэр иһитиннэрдэ.
“Билигин бары улуустарга эминэн, СИЗтарынан уонна сөптөөх мэдэссиинэ көмөтүнэн хааччыллыы сөптөөхтүк ыытыллар”, - диэтэ хотун Балабкина. Ол эрээри, сорох кэккэ улуустарга туһааннаах эмп-томп тиийбэт эбит, ол иһин резервнэй пуондаттан ылан тыырбыттар. Кини миниистир Борисованы кытары улуус кылаабынай быраастарын кытары ВКС мунньаҕы бэҕэһээ ыыппыттарын эттэ. “Мантан ыла кылаабынай быраастары кытары маннык мунньахтары хас нэдиэлэ ахсын ыытар буолуохпут, оччоҕуна хоруона хамсыгын бохсорго туох кыһалҕа баарын барытын түргэнник быһаарар кыахтаныахпыт”, - диир. Кини сорох улуустарга хоруона хамсыгар хаптарыы өр кэмҥэ бэлиэтэммэтэҕин тоһоҕолоото. Маны таһынан, кэккэ улуустар суһал ыстааптара уонна улуус дьаһалталара нэһилиэнньэ мааска эрэсиимин тутуһалларын хонтуруоллуурга бэркэ үлэлииллэрин бэлиэтээтэ. Маны сэргэ, хотун Балабкина зампред Татьяна Голикованы кытары мунньах кэмигэр дойду эрэгийиэннэригэр балаһыанньа тэҥ соҕуһун эппитин кэпсээтэ. Ольга Балабкина Саха сирэ эпидемиологическэй сезоҥҥа атын эрэгийиэннэрдээҕэр эрдэлээн киирбитин эттэ. Онуоха килиимэппит эмиэ улаханнык дьайбытын бэлиэтээтэ. Саха сиригэр хоруона хамыгыар ылларбыт дьону эмтээһин уопутун атын эрэгийиэннэр эмиэ учуоттуур буолбуттар. Олор истэригэр – куойкалары улаатыннарыы, анаалыс тмүгүн ылыы болдьоҕун аачатыы уонна амбулаторнай ыарыһахтары кытары үлэ үөрүйэхтэрин туһаныахтара. “Ааспыт сайынтан ыла ыалдьар дьон кэнтингиэнэ уларыйда: өскөтүн бу сайын ыарыы сибикитэ суох ыалдьыбыт дьон ахсаана 80 бырыһыаны ылар эбит буоллаҕына, билигин кинилэр ахсааннара аччаата, арай 65 саастарыттан үөһэ саастаах дьону уонна хроническэй ыарыылаахтар хаптараллара улаатта. Онон саастаах дьоҥҥо болҕомтону ууруохха наада”, - диэн Балбакина кэпсээтэ.
Суһал ыстаап иһитиннэрбитинэн, алтынньы 27 күнүнээҕи туругунан, Саха сиригэр хоруона хамсыгар эбии 177 киһи ыалдьыбыта бигэргэммит, ол иһигэр 33 ыарыыны илдьэ сылдьааччы (носитель). Дьокуускайга – 95, Ньурбаҕа – 17, Мэҥэҕэ – 9, Аммаҕа, Нерюнгригэ, Өймөкөөҥҥө – алталыы, Өлүөхүмэҕэ, Уус Алдаҥҥа – 5-тии, Горнайга, Муомаҕа уонна Өлөөҥҥө – 4-түү, Аллайыахаҕа уонна Ленскэйгэ – 3-түү, Алдаҥҥа, Бүлүүгэ уонна Намҥа – 2-лии, Булуҥҥа, Кэбээйигэ, Тааттаҕа уонна Хаҥаласка биирдии киһи ыалдьыбыттара бигэргэммит . Ааспыт суукка устатагар 2 киһи суорума суолламмыт.
