АЛРОСА өйөбүлүнэн Үүнэр көлүөнэ тус сыаллаах пуондата церебральнай баралыыска ыалдьар оҕолоох ыаллары “Planty Co” диэн реабилитациялыыр бырагыраамалаах кэмпилиэктэринэн хааччыйда. Кэмпилиэктэри “Лучики солнца” эрэгийиэннээҕи уопсастыбаннай түмсүүгэ тиксэрдилэр.

      Бу аппарааттар церебральнай баралыыстаах оҕолору реабилитациялыырга көмө буолуохтара: сатабылларын, үөрүйэхтэрин төһө кыалларынан толору сайыннаралларыгар кыах биэриэхтэрэ. “Planty Co” сэргэх видео-оонньууларын нөҥүө эттэрин-хааннарын эрчийиэхтэрэ. Уопсайынан, сүһүөхтэрэ ыалдьар оҕолорго бу платформа туһата үгүс буолара мэлдьэҕэ суох.

       “Доруобай оҕо мээчиги көҥүл быраҕар, сүүрэр-көтөр, уруһуйдуур кыахтаах эбит буоллаҕына, ДЦП ыарыылаах оҕоҕо, хомойуох иһин, бу судургу хамсаныылар ыараханнык бэриллэллэр. Кинилэри оонньуу нөҥүө үөрэтэр, сайыннарар ордук. Тугу гыныахтарын баҕаралларын, толкуйдуулларын хамсаныыны кытта дьүөрэлииргэ үөрэтэр. Ол эбэтэр мэйии кэһиллиитин түмүгэр хаччахтаммыт хамсаныыны чөлүгэр түһэрэргэ көмөлөһөр. “Planty Co” чопчу хамсаныылары оҥорорго мотивациялыыр, көҕүтэр. Оҕо оонньууга үлүһүйэр, ситиһиитигэр үөрэр, “мин эмиэ сатыыр кыахтаах эбиппин” диэн санааҕа кэлэр. Ыарыһах оҕолорго көмөлөспүт, өйөөбүт дьоҥҥо бука барыларыгар махтанабыт”, – диэн “Лучики Света” түмсүү бэрэссэдээтэлэ Надежда Маркова этэр.

       “Planty Co” реабилитациялыыр бырагыраааммалаах кэмпилиэги “Кинестетика” АХУо оҥорон таһаарар. Уопсастыба генеральнай дириэктэрэ Николай Сыромятников кэпсээбитинэн, кэмпилиэк оонньууларын бу эйгэҕэ үлэлиир атын омук исписэлиистэрэ эмиэ мэктиэлээбиттэр.

       “Биһиги мииссийэбит – реабилитациялыыр бырагырааманы ханнык баҕарар саастаах оҕоҕо, ыалга барсар, табыгастаах гына оҥоруу. “Planty Co” кэмпилиэгэр сайыннарар-эрчийэр видео-оонньуулар сиэрийэлэрэ уонна смартфону туттарар анал тэрил баар. Ол иһин Интэриниэт баар сиригэр ханна баҕарар – персональнай көмпүүтэртэн да, төлөпүөнтэн да –киирэр кыахтанаҕыт. ДЦП диагнозтаах оҕолоох ыалаттар маннык табыгастаах реабилитациялыыр тэриллээх буолалларыттан үөрэбин”, – диэн Николай Сыромятников эбэн этэр.

       Хампаанньа “Якутия” технопаарка уонна “Сколково” инновационнай киин резиденинэн буолар.

       “Реабилитация – уустук уонна сыаналаах бырассыас. Ыарахан сыаналаах атын туох да эбии тэрили ирдээбэт маннык хабааннаах араас үстүрүмүөн баар буолбута – улахан хардыы. Сыстыганнаах хамсык өрө турбут кэмигэр реабилитация маннык көрүҥэ ордук тоҕоостоох буолла”, – диэн “Сколково” био-мэдиссиинэ технологиятын пуондатын Кластерын бырайыактыыр менеджерэ Юлия Щеглова бэлиэтээтэ.

АЛРОСА үбүлүүр “Во имя будущего” тус сыаллаах бырагыраамма чэрчитинэн кыһалҕалаах ыалаттар маннык кэмпилиэк ылар кыахтаннылар.

АЛРОСА уонна СӨ Үүнэр көлүөнэтин Целевой пуондатын пресс- сулууспата.

Ыспыраапка:

       АЛРОСА социальнай эйгэҕэ үлэтин-хамнаһын биир сүрүн хайысхата – СӨ Үүнэр көлүөнэ пуондатын үбүнэн-харчынан өйөөһүн.

       Үүнэр көлүөнэ пуондата 1993 с. тэриллибитэ. Партнердар үбүлээһиннэринэн, 28 сыл устата 130 социальнай хайысхалаах эбийиэк тутуутугар, хапытаалынай өрөмүөнүгэр, үөрэхтээһин, билим, экология, култуура, успуорт, социальнай сайдыы бырайыактара олоххо киирэллэригэр инбэстииссийэ угуллубута.

       Пуонда өрөспүүбүлүкэ таһымнаах араас бырагырааманы, бырайыагы үбүлээһиҥҥэ толорооччу, донор, грант ылааччы, үллэрээччи оруолун толорор. Итини сэргэ 2016-2020 сс. “Во имя будущего” Целевой бырагырааманы үбүлээбитэ. АЛРОСА пуонда бөдөҥ дуонарынан биллэр. Уон сыл устата бу пуондаҕа 7 млрд. солк. харчынан көмөлөстө.

       АЛРОСА социальнай инбэстииссийэтэ бүтэһик уон сылга 98 млрд. солкуобайга тэҥнэһэр.

“Planty Co” туһунан дьиэ кэргэн санаата

      Макар (Москуба):

– Маҥнай утаа Плэнти хамсаабат дии санаабытым. Онтон иннибэр, ойоҕоспунан эргиллээппин кытта хамсаан барбытыгар олус соһуйбутум. Смартфон вибрациялаабатын туһугар истиэнэҕэ сыстыбакка турарбар ыарахан соҕус этэ. Кэлин үөрүйэхтэнэн ити кыһалҕаны быһаарбытым. Плэнти тэтимин түргэтэтиэххэ уонна бытаардыахха сөп. Саха сирин уолаттарыгар оонньуугут иһин истиҥник махтанабын!

Айталина Романова, Алина ийэтэ (Дьокуускай):

– Хамсаныы координациятын, туругу-тирэҕи сайыннарарга олус туһалаах оонньуу. Плэнти – оҕону сайыннарар, биһирэбиллээх дьоруой. Оонньуу болҕомтону тардар истииллээх оҥоһуллубут. Оҕо хамсана-имсэнэ үөрэнэригэр төһүү күүс буолар. Маҥнайгы күҥҥэ тута оҕолорум үһүөн уларса сылдьан оонньообуттара. Бары олус сөбүлээтилэр.

Оонньууну айан таһаарааччылар биир таһымҥа турбакка, уустук түһүмэхтэри толкуйдаан иһэллэриттэн үөрэбин. Ол иһин оҕо болҕомтотун ордук тардаллар.

«Planty Go» туһунан – исписэлиистэр

С.А. Чугунова, мэдиссиинэ билимин хандьыдаата, невролог-быраас (Дьокуускай):

– “Planty Co” видео-оонньуулар оҕо церебральнай баралыыһын реабилитациялыырга саҥа айыы буолар. Маннык ньыма уратыта диэн, оҕо болҕомтотун тардар, сэргэхситэр, умсутугар. Итиэннэ биир үтүө өрүтэ диэн анал болдьохтоох кэмҥэ эрэ буолбакка, күн аайы ылан дьарыктанарга кыах биэрэр. Дьарык төһө кэм ыытылларын хайдах баҕарар уларытан-тэлэритэн биэриэххэ сөп. Бу видео-оонньуулар үгэс буолбут реабилитациялыыр ньымалары ситэрэн-хоторон биэрэллэр, онно көмө буолаллар диир кыахтаахпыт.

Н.Я. Николаева, СӨ Доруобуйатын харыстабылын ыстааты таһынан сүрүн невролога, ХИФУ Мэдиссиинэ институтугар неврология уонна психиатрия хаапыдыратын сэбиэдиссэйэ, мэдиссиинэ билимин дуоктара, бэрэпиэссэр (Дьокуускай):

– Аныгы кэм оҕолорго смартфону илиилэригэр туппутунан төрүүллэр. Оҕолорго сорох оонньуу эмп курдук буолуон сөп. Тоҕо диэтэххэ, уустук быһыыга-майгыга түбэспит сүрүн дьоруой араас түһүмэҕи ааһарыгар оҕолор хамсаналлар, эрчиллэллэр.

Ньиэрбэ ыарыылаахтарга, мэйиилэрин үлэтэ кэһиллиилээх дьоҥҥо маннык реабилитация туһалаах буолара саарбаҕа суох. Видео-оонньуу сөптөөх аудиторияҕа ананан оҥоһуллубут. Кыра когнитивнай уонна хамсаныылара кэһиллиилээх оҕолорго үчүгэй түмүгү көрдөрүөн сөп. “Planty Co” оонньуур сиэссийэ кэмэ 10 мүнүүттэн тахсыбат. Күн устата хаста да хатыланыан сөп. Ол иһин оҕолору сылаппат, болҕомтолорун мэлдьи тардар.