Войти

Войти

Саха сиригэр эмп сыанатын үрдэтэн атыылыыр урбаанньыттары сыныйан бэрэбиэркэлиэхтэрэ. Бу туһунан хамсыгы бохсор суһал ыстаап уочараттаах мунньаҕар Ил Дархан Айсен Николаев эппит.

Айсен Николаев бырабыыталыстыбаҕа уонна Росздравнадзорга эмп сыаната бас-баттах барбыт нэһилиэнньэлээх пууннартан киирбит үҥсүүлэри бэрэбиэркэлииргэ сорудахтаабыт.

“Күн бүгүҥҥээҥи дылы аптекаларга эмп сыаната олус үрдүгүн туһунан үҥсүү бөҕө киирэ турар. Бу иннинэ эмп тиийбэтин этэллэр этэ, оттон билигин сыана олус ыараханын туһунан үҥсүүлэр улааттылар. Дьон оннооҕор биир нэһилиэнньэлээх пууҥҥа сыана араастаһарын этэр. Алдьархайтан ас таһаарынар диэн сыыһа. Ону тохтотуохха наада. Бэрэбиэркэлээҥ”, - диэн Айсен Сергеевич мунньах кэмигэр эппит.

Күн ахсын улуустарга ыарыһах ахсаана улаата турар, ыарахан туруктаах эмиэ элбиир – билигин 122 киһи ыарахан туруктаах сытар, ол иһигэр 93 ыарыһах кислородунан тыынан көмөнү ылар, 29 киһи ИВЛга холбонон сытар. Инньэ гынан Айсен Сергеевич эмтэнии методикатын хос көрөргө, телемедицинаны күүһүрдэргэ уонна миэстэтигэр бобуллар миэрэлэри күүһүрдэргэ эппит.

Нэдиэлэ устатыгар Дьокуускайга, Ленскэйгэ, Мэҥэ Хаҥаласка, Мииринэйгэ, Намҥа, Ньурбаҕа, Өймөкөөҥҥө, Тааттаҕа, Хаҥаласка балыыһаҕа киирии улааппыт. Онон кураанах куойка биллэ аҕыйаабыт. Ону Ольга Балабкина “65 саастарыттан үөһээ саастаах пациеннары уонна дьарҕа ыарыылаахтары ыарыы хайдах да барбытын иһин тута балыыһаҕа угаллар”, - диэн быһаарбыт.

Тарҕат:

Добавить комментарий