Войти

Войти

Ааспыт суукка устатыгар Саха сиригэр эбии 242 киһи хоруона хамсыгар сутуллубута бигэргэммит. Бу туһунан хамсыгы бохсор суһал ыстаап салайааччытын солбуйааччы Ольга Балабкина брифинг кэмигэр кэпсээтэ.

Ол курдук, Дьокуускайга 148 киһи ыалдьыбыт. Мэҥэ Хаҥаласка, Нерюнгрига уонна Чурапчыга алталыы киһи ыалдьыбыт, Алдаҥҥа, Аллайыахаҕа, Аммаҕа, Бүлүүгэ уонна Мииринэйгэ – 5-тии, Эдьигээҥҥэ, Кэбээйигэ, Өймөкөөҥҥө, Уус Алдаҥҥа уонна Хаҥаласка – 4-түү киһи ыалдьыбыттара биллибит. Үстүү ыарыһаҕы Анаабыр, Үөһээ Бүлүү, Горнай, Ньурба, Өлөөн, Сунтаар уонна Томпо улуустарыгар булбуттар. Биирдии ыарыһах Дьааҥы, Ленскэй, Нам, Орто Халыма, Таатта уонна Уус Майда улуустарыгар бааллара биллибит. Хомойуох иһин, суукка устатыгар 3 киһи суорума суолламмыт. Өрөспүүбүлүкэ лабораториялара 5217 коронавирус анаалыһын оҥорбуттар. Уопсайа хамсык саҕаланыаҕыттан 721675 тест ыытыллыбыт.

Ил Дархан саҥа уурааҕынан, мантан ыла үлэни биэрээччилэр үлэһиттэригэр хас күн ахсын термометрияны ыыталлара булгуччулаах диэн буолла. Урут маннык дьаһал сүбэ эрэ быһыытынан этэ. Термометрия ыытылларын суоҕун үлэ уонна социальнай харалта министиэристибэтэ хонтуруоллуоҕа. Суһал ыстаап улуустарга эбии куойкалары арыйар туһунан тобулар. Маны таһынан, аптекаларга уонна балыыһаларга тустаах эминэн хааччыйыы боппуруоһа сытыытык турар. Биэс быраас Москубаҕа күүстээх клиникаларга таһымнарын үрдэтэ барбыттар. Сыл бүтүөр дылы 15 быраас маннык кууруһу ааһыаҕа. Дьиэҕэ сытан эмтэнээччилэргэ эминэн хааччыйыыга ирдэнэр хантыраактар түһэрсиллибиттэр. Өрөспүүбүлүкэ бүддьүөтүттэн поликлиникаларга эми тиэрдии түмүктэммит. Бу нэдиэлэҕэ эбии саҥа ИВЛ аппарааттара кэлиэхтэрэ. Бу иннинэ социальнай ситимнэргэ хааччахтар ахсынньы 1 күнүттэн көтүрүллэллэр диэн сымыйа дойҕоҕу ылыммаккытыгар суһал ыстаап ыҥырар.

Тарҕат:

Добавить комментарий