Дьааҥы улууһун Сайдыытыгар 2023 сылга 120 миэстэлээх оскуола-сад тутуллуоҕа. Бу туһунан улуус дьаһалтатын тутууга начааынньыга Михаил Другин иһитиннэрбит.
Оскуола-сад тутуута өрөспүүбүлүкэтээҕи инвестбырагыраамаҕа киирбит. Быһа холоон саҥа тутууга 2,45 мөл. солк. ирдэнэр. Бастаан улахан оскуоланы тутаары былааннаабыттар, оттон нэһилиэккэ оҕо ахсаана аҕыйыы турарын учуоттаан оскуола-сад буолар буолбут. Бастакы этээһигэр универсальнай успуорт саалата, кылаастар, таҥас устар сир, остолобуой, мастарыскыай, мэдэссиинэ кэбиниэтэ, техсаала уонна утуйар сир баар буолуо. Иккис этээскэ дириэктэр, психолог, учууталлар кэбиниэттэрэ, бибилэтиэкэ, физкультура уонна муусука уруоктарыгар саала, үөрэх кэбиниэттэрэ баар буолуохтара. Бу дьыл ахсынньы 15 күнүгэр тутууга экологическэй куттал суоһаабатын туһунан уопсастыбаннай истиилэр буолуохтара. Бүтэһиктээх быһаарыыны госэкспертиза ааспытын кэннэ ылыахтара.
