“Nordwind” уонна “S7” авиа-хампаанньалар сөмөлүөттэрэ мантан антах Дьокуускайтан Турция Стамбул уонна Кытай Ханчжоу куоратыгар быһа көтөр буолуохтара. Ол туһунан бирикээһи Росавиация таһаарбыт.
Докумуоҥҥа сурулларынан, “S7” авиа-хампаанньа Кытайга нэдиэлэҕэ алтата, оттон “Nordwind” Турцияҕа үстэ көтөр буолуохтара. Күн бүгүн Дьокуускайтан ити куораттарга биир даҕаны сөмөлүөт быһа көппөт.
Уопсайынан, Росавиация араас хампаанньаларга 148 маршрукка көҥүл биэрбит. Ол иһигэр “Якутия” авиа-хампаанньаҕа эмиэ.
Санаттахха, күн бүгүн Арассыыйаттан маннык судаарыстыбаларга көтөр көҥүллэнэр: Белоруссияҕа, Казахстаҥҥа, Киргизияҕа, Соҕуруу Кэриэйэҕэ, Египеккэ, Араап холбоһуктаах эмираттарыгар, Турцияҕа, Улуу Британияҕа, Швейцарияҕа, Танзанияҕа, Сербияҕа, Японияҕа, Эфиопияҕа, о.д.а.
