Бэҕэһээ Дьокуускай куорат Кангалас түөлбэтин баһаарынай сулууспатын үлэһиттэрэ үлэ усулуобуйатын тулуйбакка, аччыктааһыны биллэрбиттэрэ. Дьиҥэ, кинилэр бу иннинэ бэйэлэрин бырааптарын сокуон хараҕынан кырдьыгы була сатаан баран, маннык бүтэһиктээх быһаарыныыны ылыммыттар. Кангаластар сыл аҥаарын иһигэр 40-тан тахса суут көрүүтүгэр кыайбыттар (дисциплинарнай эппиэтинэскэ сыыһа тардыы, 13-с хамнаһы хос ааҕыыга уонна төлөөбөт буолууга дьыалалар). Маны таһынан, кинилэр суукка анал таҥаһынан-сабынан хааччыллыахтаахтарын дакаастаабыттар. Ол гынан баран, төһө да сокуон кинилэр диэки буоллар, күн-бүгүн балаһыанньа көммөтөх. Оттон бырааптарын туруулаһар саамай көхтөөх үлэһиттэри уураталаан барбыттар. Инньэ гынан, Кангалас баһаарынайдара аччыктааһыны биллэрэргэ күһэллибиттэр.
Аны бүгүҥҥүттэн Кангаластааҕы кэллиэгэлэрин Үөһээ Халыма улууһун Зырянка бөһүөлэгин уонна Маҕан баһаарынайдара өйөөтүлэр уонна эмиэ аччыктааһыны биллэрдилэр.
Маҕан баһаарынай чааһын 7 баһаарынайа аччыктааһыны биллэрдилэр
Кангаластар бэҕэһээ аччыктааһыны биллэрбиттэригэр сүпсүлгэн бөҕөтө буолбут, хотун-тойон быыстала суох кэлэн барбыт. Сменаны дьуһуурустубаттан уста сатаабыттарын баһаарынайдар юристара көмүскэһэн уһултарбатах.
Зырянка баһаарынайдара
Зырянка баһаарынай чааһыгар 24 үлэһит баарыттан 22-тэ аччыктааһыны биллэрбит. Кинилэр туруорсуулара үкчү кангаластар туруорсууларын курдук. Оттон Маҕан баһаарынай чааһыгар караулга баара-суоҕа икки эрэ үлэһиттээх эбит – караул начаалынньыга уонна суоппар. Кинилэр салалтаҕа хаста да саатар биир байыаһы көрөллөрүгэр этэ сатаабыттар да, кумаардаан да көрбөтөхтөр. Диспиэччэр, баһаарынай ыстаатын туһунан этэ да барыллыбат.
ОНФ актыбыыстара баһаарынайдар докумуоннарын үөрэтэн көрбүттэр уонна чахчы ГБУ салалтата суут уураахтарын толорботун бигэргэтэллэр. Ити – ХК хараҕынан 315 ыст. (суут уурааҕын соруйан толорбот буолуу).
Премьер Чекин бэҕэһээ суһаллык мунньах тэрийбит. Онно баһаарынайдар хамнастарын уонна материальнай-техническэй хааччыллыыларын көрбүттэр. Чекин “боппуруоһу үлэһиттэр туһаларыгар быһаарыахха наада” диэн мас-таас курдук тустаах министиэристибэлэргэ эппит. Нэһилиэнньэҕэ куттал суоһаабатын хааччыйар судаарыстыбаннай кэмитиэт салайааччыта Юрий Зайцев “баһаарынайдар туруорсууларын түһүмэхтэринэн толорорго этии киирдэ” диир.
kyym.ru
