Саха сиригэр “Сир уустара” өрөспүүбүлүкэтээҕи үөрэтэр-чэбдигирдэр киин аһылынна

СӨ Үөрэх уонна билим министиэристибэтин “Юные якутяне” өрөспүүбүлүкэтээҕи ресурса киинин салаатын быһыытынан “Сир уустара” үөрэтэр-чэбдигирдэр киини арыйыы үөрүүлээх тэрээһинэ буолан ааста.

Бу сонун Киини олоҥхо дойдута Сунтаар улууһун Кэппэндээйи сэлиэнньэтигэр түстэммит Г.Е. Чолбодуков аатынан эмтээх буорунан чэбдигирдэр сонотуоруйга тэрийдилэр.

Бу үөрэтэр-чэбдигирдэр киин аан бастакы симиэнэтигэр “Робототехника”, «Удивительная Якутия», «Современные танцы» уонна «Englishmate» бырагыраамаларга үөрэниэхтээх бөһүөлэк оҕолоро киирдилэр.

Оттон кэлэр сыл тохсунньутуттан саҕалаан, манна өрөспүүбүлүкэ  атын улуустарын оҕолоро тиийэ кэлэн үөрэнэр уонна доруобуйаларын тупсарынар, билиилэрин хаҥатар, талааннарын арыйар кыахтанаыахтара.

Киин арыллыытын бэлиэ тэрээһинин кыттыылаахтарын өрөспүүбүлүкэ салалтатын, Сунтаар оройуонун уонна Кэппэндээйи сэлиэнньэтин бэрэстэбиитэллэрэ, ону таһынан бастайааннай партнердар, “Юные якутяне” киин доҕотторо бу бэлиэ даатанан истиҥник эҕэрдэлээтилэр, үтүө санааларын тиэртилэр.

Кинилэр истэригэр СӨ “Үүнэр көлүөнэ тус сыаллаах пуонда” генеральнай дириэктэрэ Владимир Егоров кытынна. Владимир Анатольевич пуонда саҥа кэнсиэпсийэтин олоххо киллэриигэ бииргэ үлэлэһии быһаарар оруоллааҕын, суолталааҕын анаан бэлиэтээтэ.

"Биһиги оҕо аймах уонна ыччат өй-санаа, сиэр-майгы, духуобунас, өркөн өй уонна эт-хаан өттүнэн сайдыытыгар дьоһуннаах болҕомтобутун уурабыт. "Сир уустара" киин арыллыыта – Саха сирин оскуолаҕа үөрэнээччилэрин туһалаах сынньалаҥын, доруобуйалара тупсуутун уонна билим-чинчийэр өттүнэн сайдыыларын тэрийии биир сонун түһүмэҕэ. Кэппэндээйи курдук ураты, кэрэ айылҕалаах, эриэккэскэ көстөр сир баайдаах, талба-мааны сиргэ түстэммитэ ордук туһалаах буолуоҕа, ол да иһин биһиги бу Киин итиннэ арылларын туһугар бары үлэлэстибит. Оҕолор Кииҥҥэ дьарыктанан, билиилэрэ кэҥиэ, элбэх интэриэһинэйи арыйыахтара, саҥа эрэллээх доҕоттору булунуохтара, иэйии-санаа сырдык өттүн билиэхтэрэ диэн эрэллээхпин. Эһиэхэ астына-дуоһуйа сынньанан баран, чинчийиигэ көхтөөхтүк кыттаргытыгар уонна бу манна сомсубут билиигитин оскуолаҕа туһаныаххытыгар баҕарабын", - диэтэ пуонда салайааччыта.

Манна эбэн эттэххэ, ити сиргэ СӨ “Үүнэр көлүөнэ тус сыаллаах пуонда” көмөтүнэн, алмаас хампаанньата “АЛРОСА” АХ (ПАО) үбүгэр “Сир уустарыгар” анаан, аныгы, куттал суох буолуутун хааччыйыыга эппиэттэһэр күрүө (ограждение) тутуллубут.

Эһиил манна 40 миэстэҕэ суоттааммыт, Кииҥҥэ кэлбит дьон утуйар куорпустара тутуллуохтаах.

“Юные якутяне” өрөспүүбүлүкэтээҕи ресурса киинин дириэктэрэ Варвара Васильева бэлиэтээбитинэн, “Сир уустарыгар” үөрэтии түөрт сүрүн хайысхалаах буолар:

- естественнэй-билим (мэдиссиинэни уонна тыа хаһаайыстыбатын сайыннарыы тирэҕэ);

- политехническай  (технологияны уонна техноиндустрияны сайыннарыы тирэҕэбаза для развития технологии и техноиндустрии);

-креативнай айымньы (декоративнай-прикладной ускуустуба (ДПИ) уонна уус дьыалатын идэлээхтэрин сайыннарыы төрүтэ);

- туризм-кыраайы үөрэтии  (этно уонна эко-туризмы уонна социокультурнай сырдатыыны сайыннарыы төрүтэ). Ону таһынан маннык кэлбит оҕолор доруобуйаларын чэбдигирдэргэ саҥа оборудование туттуллуохтаах: рап төрүтүгэр боруоҥха, тыҥа, пневмо- уонна мэхэниичэскэй массаас, ЛФК, фитобар баар буолар.

Смарт-бибилэтиэкэни, улахан аактабай сааланы уонна да атын аныгы холбоһук элэмиэннэрин үлэлэтэр былааннаахтар.

Дьэ, ити курдук, уус курдук олус наадалаах идэҕэ сыһыаннаах бэрт интэриэһинэй киин үлэтин саҕалаата.