Айсен Николаев Ил Түмэҥҥэ Туһаайыытыгар эһиил Өлүөнэ күргэтин тутуу саҕаланарын биллэрдэ.
"Дойду бэрэсидьиэнин өйөбүлүнэн биһиги ыра санаа гыммыт бырайыакпыт - Өлүөнэ күргэтин тутуу олоххо киллэриитэ саҕаланар буолла. Юрий Трутнев быһаччы көмөтүнэн, Өлүөнэ күргэтин тутуу Уһук Илин сайдыытын Национальнай бырагырааматыгар киирдэ. Күргэ бырайыагын оҥоруу түмүктэммитэ, билигин судаарыстыбаннай эспэртиисэҕэ сытар. Сотору кэминэн тутууну саҕалаабытынан барыахпыт", - диэтэ Айсен Николаев.
Ил Дархан өрөспүүбүлүкэ быйыл күргэлэри тутууга үчүгэй көрдөрүүлэрдээҕин эттэ. "Бүлүү" федеральнай суолга 4 күргэ - Аччыгый Ботуобуйаҕа (Миирнэй), Түүкээн (Ньурба), Улахан Мугур уонна Саһар үрэҕэр (Сунтаарга) тутуллубутун эттэ.
