Ил Түмэн урукку дьокутааттарыгар - Александр Уаровка уонна Дмитрий Саввиҥҥа тэриллибит холуобунай дьыаланы суукка көрүү өр кэмнээх сынньалаҥ кэнниттэн сөргүтүллүбүт.
Тохсунньу 19 күнүгэр Дьокуускай куораттааҕы суукка дьокутааттар дьыалаларын салгыы көрүөхтэрэ. Уаровка уонна Савиҥҥа холуобунай дьыаланы өссө 2018 сыл муус устарыгар тэрийбиттэрэ. Бу туһунан биһиги сиһилии хаста да суруйан турабыт. Силиэстийэ урукку сололоохтору "Сахаплемобъединение" урукку дириэктэриттэн Степан Охлопковтан 900 тыһ. солк. бэрик ылбыттарыгар уорбалыыр. Уаров уонна Саввин көмөлөрүнэн тэрилтэ эбии 95 мөл. солк. ынаҕы сиэмэлииргэ үбү ылбыт диэн силиэстийэ саныыр. Маны таһынан, Уаров төрөөбүт дойдутугар - Сунтаарга командировкаҕа тиэстэригэр гостиницаҕа хонобун диэн Ил Түмэнтэн харчы ылан баран, аймахтарыгар эҥин хонуктаабыт, онтон буҕалтыарыйаҕа кэлэн сымыйа кибитээнсийэлэри аҕалан отчуоттаабыт. Инньэ гынан, Уаров эбии 2016-2018 сс. 159 тыһ. солк. бүддьүөт харчытын ыскайдааһыҥҥа уорбаланар.
Дьокутааттарга тэриллибит дьыала куораттааҕы суукка 2018 сыл ахсынньытыгар киирбитэ. Оттон пандемия саҕаламмытыгар саастаах дьону саалаҕа аҕалан сууттуур табыллыбат диэн хаста да көһөрбүттэрэ.
