Алдан куорат биэс эр киһитин уонна Нерюнгри биир олохтооҕун эр киһи дьахтарга кубулунан отоойкоҕо олордуталаабыт. Эмсэҕэлээбиттэр интэриниэтинэн имэҥнээх өҥөлөрү оҥорор "Викторияны" кытары билсибиттэр.
Ыйыллыбыт төлөппүөҥҥэ эрийбиттэрэ үкчү дьахтар куолаһа эппиэттээбит. Кини "бастаан харчыгытын моббааммар ыытыҥ, ол кэнниттэн таҕылгытын ханнарар өҥөбүнэн туһаныаххыт" диэбит. Ол туһугар төлөппүөнүнэн манньыйбыт куолаһынан өр ыаһахтаһар, бассаабынан суруйсар эбит, онтон "көрсүөххэ" диэн матыыптаан 10 тыһ. ыыттарар эбит. Онуоха ымсыырбыт эрэттэр харчыларын ыытан испиттэр. Ол кэннэ анарааҥҥылара отой да сүтэн хаалар адьынаттаах эбит. Онтон кыһыйан, албыннаппыт эр дьон полицияҕа тыллаабыттар. Кимэ биллибэт Викторияны полиция оперативниктара ирдээн барбыттар. Арай доҕоор, Викториялара отой да Дьокуускайга олорор 34 саастаах эр киһи буолан биэрбит! Кини төлөппүөнүнэн кэпсэтэригэр куолаһын кыйбаҥнас дьахтар куолаһыгар уларыта-уларыта кэпсэтэр эбит. Билигин "Викторияны" утары Арассыйа ХК 159 ыст. 2 ч. (түөкүннээһин) диэн холуобунай дьыаланы көбүппүттэр. Бу туһунан Саха сиринээҕи ИДьМ пресс-сулууспата суруйар.
