Мииринэй куорат салалтата, АЛРОСА бэрэстэбиитэллэрэ муус устар 19 күнүгэр Мииринэй куораттааҕы типография үлэһиттэрин Арассыыйатааҕы полиграфистар идэлээх күннэринэн эҕэрдэлээтилэр.
Быйылгыттан типографияны “Ситим” медиа-бөлөх бас билиитигэр ылбыта. “Ситим” салалтатын аатыттан дириэктэри солбуйааччы Вероника Павлова типография үлэһиттэригэр идэлээх бырааһынньыктарынан Ил Түмэнтэн Бочуотунай Грамоталары, СӨ Сибээс уонна информационнай технология, гражданскай уопсастыбаны сайыннарыы министиэристибэлэриттэн махтал суруктары туттартаата.
Мииринэйдээҕи типография Саха сиригэр алмаас бырамыысыланнаһын сайдыытын, быйыл 58 сааһын туолар Мииринэй куораты кытары эт саастыы. Төһө да кэм-кэрдии аастар, типография олоҕу кытары эрэллээхтик тэҥҥэ хардыылыыр. Типография сурунааллары, хаһыаттары, бланкалары эрэ буолбакка, дьэрэкээн өҥнөөх кинигэлэри, альбомнары уонна эгэлгэ моһуоннаах араас полиграфия бородууксуйаларын таһаарар. Билигин улахан болҕомто тэрилтэ маркетиныгар уонна килийиэннэри тардыыга ууруллар.
Типография “Якутия” авиа хампаанньа бортовой сурунаал версткатын оҥорон саҕалаабыт. Итиэннэ ыаллыы сытар Ленскэй, Сунтаар уонна атын улуустары кытта ситимнээхтик үлэлээн саҕалаата. Типография үлэһитэ үгүстэрэ уопуттаах, үлэлииргэ кыахтаах аныгы кэм дьоно. Манна да5атан эттэххэ, мобильнай версиялаах типография саҥа саайта mgt-mirniy.ru аһылынна. Саайтан Миириной олохтоохторо типография туһунан наадалаах иһитиннэриини, өҥө арааһын туһунан билиэхтэрэ-көрүөхтэрэ. Онон тэрилтэ үлэлиир кыаҕа биллэ улаатыа.
АЛРОСА корпоративнай коммуникацияҕа уонна сибээһи кытары үлэҕэ отделын Управлениетын начаалынньыга Ирина Валявина кэлэктииби идэлээх бырааһынньыктарынан истиҥник эҕэрдэлээтэ уонна бырааһынньыктааҕы туорду бэлэх уунна.
Типография үлэһиттэрин алмаастаах кыраай биллэр-көстөр дьоно – урукку улуус баһылыга Анатолий Тарасович Попов уонна атын типография бэтэрээннэрэ эҕэрдэлээтилэр.
“Мирнинский рабочий” хаһыат кылаабынай эрэдээктэрэ Андрей Гибало биир идэлээхтэрин таһаарыылаах үлэлэрин тоһоҕолоон туран эҕэрдэлээтэ.
“Ваше право. Дальний Восток” хаһыат сүрүн эрэдээктэрэ Игорь Саввинов, кэнники кэмҥэ төһө даҕаны ааҕааччы Интэриниэт СМИгэ көспүтүн иһин, “Ситим” медиа-бөлөх федеральнай таһымҥа “Арассыыйа Почтатын” кытары утумнаахтык үлэлэһэн, сурутуу уонна тарыып харчытын тутан олорорун быһыытынан, полиграфия өҥөтө өссө да кэскиллээҕин тоһоҕолоото. Кини бэчээттэнэр таһаарыылар төрөөбүт тылы харыстыырга сүҥкэн оруоллаахтарын, хаһыаттар, сурунааллар билигин да тоҕоостоохторун, нэһилиэнньэ наадыйарын бэлиэтээн туран, типография маныаха улахан кылааты киллэрэрин эттэ.
Маны таһынан, үөрүүлээх тэрээһиҥҥэ “Дерево добра” диэн кыаммат араҥаҕа босхо сурутууну бэлэхтиир үтүө санаа аахсыйата тэрилиннэ. “Арассыыйа Почтата” үлэһиттэрэ миэстэтигэр аахсыйа чэрчитинэн сурутуу оҥордулар.
Мииринэй куораттааҕы типография дириэктэрин эбээһинэһин толорооччу Ирина Бреус идэлээх бырааһынньык эҕэрдэлэһэргэ эрэ буолбакка, кэлэр кэскили түстүүргэ, былааннары олохтуурга тоҕоостоох кэм буоларын тоһоҕолоото.
