Саха сиригэр 2017 сыл түмүгүнэн суут бириистэптэрэ барыта 5,8 млрд солкуобай суумалаах иэһи-күүһү ыга үктээн төлөппүттэр. Онтон 1,8 млрд солкуобайа бүддьүөккэ киирбит.
“Элбэх, улахан суумалаах суут аахтата киирэрэ сыллата элбээн иһэр. Ол да буоллар үлэбитин кыайабыт”, -- диир өрөспүүбүлүкэтээҕи суут бириистэптэрин салайааччы Алексей Никифоров. Кини бэлиэтээбитинэн, бириистэптэр былырыын 200 тыһыынча кэриҥэ дьыаланы көрөн түмүктээбиттэр. Аны туран, урукку өттүгэр, сүрүннээн, ГАИ уорганнарын ыстараабын ирдэһэр эбит буоллахтарына, ааспыт сылга ол көрдөрүү инньэ 13 %-нан түспүт. Ону былырыын “ыстыраабы тута төлүүр буоллахха 50 % чэпчэтии көрүллэр” диэн уларыйыы киирбитин кытта ситимнииллэр. “Суоппардар тута төлүүр барыстааҕын өйдөөннөр ыстыраабы сыһа-соһо сылдьыбаттар. Ол оннугар элимиэн, кирэдьиит, ДьУоХХ төлөбүрүн ирдэбилэ элбиир”, -- диир өрөспүүбүлүкэ сүрүн бириистэбэ иһитиннэрэр.
