Ааспыт сыл бүтүүтэ, бүтүн Арассыыйатааҕы «Технология көҥү көтүүтэ 2020» бириэмийэ кыайыылаахтарын быһаарыыга дойду үрдүнэн үлэлиир “Точка Кипения” тэрилтэлэрин күрэҕин сыллааҕы түмүгүн таһаарыы буолла. Уопсайа 110 тэрилтэттэн уон номинацияҕа кыайыылаах быһаарыллыахтааҕа. Түмүккэ, Дьокуускай куораттааҕы “Точка Кипения” тэрилтэтэ “Digital гуру” номинацияҕа бастаан, күрэххэ кыайдылааҕынан буоллулар. Кыайыыларын туоһутун анал статуэтканы уонна Арассыыйа бэрэсидьиэнин цифровой уонна технологическай сайдыыга анал бэрэстэбиитэлэ Дмитрий Песков илии баттаабыт махтал суругун бу күннэргэ туттулар.
“Digital гуру” номинация – онлайн тэрээһиннэр саамай актыыбынай тэрийээччилэригэр ананар. Бу номинацияҕа кыайыылааҕы быһаарыы тэрилтэ ыытар үлэтин ис хоһооно киэҥ сиринэн тэнийэн олорор куйаар ситимин туһанааччыларга ордук тиийимтиэтинэн уонна манна ыытыллар тэрээһиннэри киэҥ эйгэттэн киирэн туһанар сигэлэрэ тарҕаныыта элбэҕинэн сыаналанна.
“Точка Кипения – Якутск ” – хамаанданан 2020 сыл устата, онлайн уонна оффлайн көрүҥүнэн бүтүннүүтэ - 254 тэрээһин ыытыллыбыт. Кыттааччы ахсаана сыл устата – 6714 киһиэхэ диэри тиийбит.
Иван Степанов бырагыраамма дириэктэрэ:
- Ааспыт сыл устата биһиги хамаандабыт үгүһү оҥордо. Ол курдук биһиги, Стратегическай инициативалар ааҕыныстыбаларын (АСИ) куораттар 100 бастыҥ лиидердэрин үүннэрэр акселераторын ааспыппыт, биһиги бастакынан “Точка Кипения” тыа сиринээҕи филиалын арыйбыппыт, саҥа үлэ хайысхаларын тобуллубут, онлайн сибээһинэн ордук таһаарыылаахтык үлэлиир буоллубут. 2020 сыл сүрүн ситиһиитинэн “Точка Кипения – Якутск ” хамаандабыт “Digital гуру” номинацияҕа кыайыылааҕынан тахсыыта уонна дойду 10 бастыҥ “Точка Кипения” тэрилтэлэрин ахсааннарын истэригэр киириитэ буолла. Кэлэр сылга даҕаны былааммыт элбэх. Интэриэһинэй ис хоһоонноох араас тэрээһин барыаҕа. “Точка Кипения” уопсастыба хамсатар күүһэ буоларын туһугар, биһиги үгүс сырабытын, күүспүтүн ууруохпут, - диэн кэпсээтэ.
