Быйыл Саха сиригэр хоруона хамсыгын туһунан сымыйа сураҕы тарҕатан 38 киһи буруйданна. Онтон алта киһитин барыта 105 тыһыынча солкуобайга ыстарааптаатылар.
“Саха сиринээҕи суһал ыстаап иһитиннэрэринэн, өрөспүүбүлүкэ үрдүнэн хоруона хамсыгын туһунан сымыйа сураҕы-сонуну тарҕатыы 38 түбэлтэтэ бэлиэтэннэ”, -- диэн Ил Дархан уонна бырабыыталыстыба пресс-сулууспата суруйар. Ол түмүгэр Дьокуускай, Алдан, Сунтаар, Мииринэй уонна Ленскэй дьоно эппиэккэ тардыллыбыттар.
25 түгэҥҥэ административнай дьыаланы тохтоппуттар, ону таһынан түөрт матырыйаал суукка киирбит: үс – Дьокуускайга, биир – Чурапчы улууһугар.
“Кэбээйигэ тэриллибит дьыаланы ситэрэн-хоторон биэрэргэ төттөрү ыыттылар. Ньурба улууһугар тахсыбыт дьыаланы өссө да силиэстийэлии сылдьаллар”, - диэн иһитиннэриигэ суруйаллар.
