Войти

Войти

Кэбээйи улууһун ыраах хайалар быыстарыгар сытар Сэбээн-Күөл бөһүөлэгиттэн төрүттээх Сергей Кривошапкин, муус устар 6 күнүгэр, Салехард куоракка буолан ааспыт, Сибиир уонна Уһук Илин Хотугу аҕыйах ахсааннаах төрүт омуктарын Форумнарыгар, «Хотугу Сулус» мэтээлинэн наҕараадаланна, диэн суруйар «Илкэн» хаһыат.

2017 сыллаахха торҕон эһэ киһиэхэ саба түспүт. Сергей Кривошапкин куттанан куоппатах, уолуйбакка көмөҕө ыстаммыт – уонна сиэмэх кыылы кытары хапсыһыыга кыайыылааҕынан тахсыбыт. Кини харса суох, быһаарыныылаах туттунуутун түмүгэр – киһи сырдык тыына быыһаммыт. Бу түгэҥҥэ уолчаан баара-суоҕа Сэбээн-Күөл национальнай, эбээн оскуолатын 11 кылааһын үөрэнэччитэ, уу-нуулдьаҕай саҥа борбуйун көтөҕөн эрэр ыччат оҕо эбит, сайыҥҥы каникул кэмигэр аймахтарыгар ыстаадаҕа көмөлөһө сылдьыбыт. Бүгүн Сергей Кривошапкин – А.И.Герцен аатынан Хотугу норуоттар Үнүстүтүүттэрин иккис кууруһун устудьуона. Төрөөбүт эбээн тылынан ырыа, хоһоон суруйар.

«Хотугу Сулус» мэтээл Арассыыйа Федерациятын Сибиир уонна Уһук Илин Хотугу аҕыйах ахсааннаах төрүт омуктарын Ассоциацияларынан 2017 сыллаахха олохтоммута. Мэтээл Бүтүн Арассыыйатааҕы уопсастыбыннай тэрилтэ үрдүк наҕараадата буолар ( бэлиэ знак) уонна Арассыыйа Федерациятын гражданнарыгар уһулуччу үтүө быһыыларын иһин бэриллэр, бэйэлэрин бырааптарын, төрүт үгэстэринэн олорор эйгэлэрин көмүскээбиттэригэр, уонна ыксаллаах быһыы-майгы кэмигэр дьоҥҥо куттал суоһууругар бэйэлэрин харыстаммакка, көмөҕө кэлэллэрин иһин.

Тарҕат:

Добавить комментарий