Сүрүн бирииһи – квадроциклы – Чурапчыттан сылдьар Макаровтар дьиэ кэргэттэрэ ылла.
Мэҥэ-Хаҥалас улууһугар “Аҕа күрэҕэ” диэн успуорт куокуруһа түмүктэннэ. Икки күн Тиэлиги нэһилиэгэр ыытыллыбыт күрэхтэһиилэргэ 18 олохтоох тэриллиилэртэн, 21 хамаанда кытынна диэн, иһитиннэрэр Саха сиринээҕи Үлэ уонна социальнай сайдыы министиэристибэтин пресс-сулууспата.
Бэйэтин улууһун, эбэтэр куоратын олохтоох тэриллиилэртэн көрдөрүү иһин сүүстэн тахса дьиэ кэргэн илин-кэлин түһүстэ.
Дьиэ кэргэттэр булчут биатлона, бэрэбинэ суоруута, мас хайытыыта, ойбон алларыыта курдук дьиҥнээх эр киһи дьарыктарыгар ким сымсатын, түргэнин, бэргэнин тургутусталар. Баҕанаҕа ыттан ким ордук сылбырҕатын сөҕө-махтайа көрдүлэр.
Күрэхтэһии түмүгүнэн, уопсай хамаанданан сочуокка үһүс бочуоттаах миэстэҕэ тигистэ Чурапчыттан төрүттээх – Кривошапкиннар дьиэ кэргэн, күндү бириис быһыытынан Мэҥэ-Хаҥалас улууһун баһылыган аатыттан – кулунчугунан наҕараадаланна.
Иккис миэстэҕэ таҕыстылар – Тааттаттан төрүттээх Чупровтар дьиэ кэргэн. Дойдуларыгар үөрэ-көтө мотоцикл бириистээх айаннаатылар.
Бүтүн өрөспүүбүлүкэтээҕи XXI «Аҕалар күрэхтэрин» муҥутуур чөмпүйүөнүнэн буолла – Макаровтар дьиэ кэргэн. Үлэ уонна социальнай сайдыы министирин солбуйааччы Макаровтарга кыайыылаах куубагын туттарда, чөмпүйүөн курун уонна сүрүн бириис – квадроцикл!
Төрдүс миэстэҕэ тиксибит Мэҥэ-Хаҥалас улууһуттан төрүттээх Васильевтар дьиэ кэргэн НО “Целевой фонд будущих поколений РС (Я)” тэрилтэттэн – 30 000 харчынан сэртэпикээт бэлэх тутта.
Бэһис миэстэҕэ тиксибит – Амма улууһуттан төрүттээх Захаровтар дьиэ кэргэн – «Саха сирин аҕаларын түмсүүлэрэ» уопсастыбыннай тэрилтэттэн СКС карабинынынан наҕараадаланна.
Успуорду көҕүлүүр санаанан эрэ муҥурдаммакка, сылын ахсын ыытыллар “Аҕа күрэҕэ” сыала-соруга киэҥ далааһыннаах. Чөл олоҕу өрө тутуу, төрүт үгэстэри сөргүтүү – кэлэр көлүөнэҕэ иҥэрии, аҕа оруола оҕону иитиигэ үрдүкү таһымҥа тахсыыта, дьиэ кэргэн сыаннастарыгар ытыктабыл.
