Саха сирин былаастара 2021/22 сылларга быраастары уонна мэдиссиинэ үлэһиттэрин бэлэмнээһиҥҥэ 260 тус сыаллаах миэстэлэри көрдүлэр диэн өрөспүүбүлүкэ билимин уонна үөрэхтээһинин миниистирин солбуйааччы Михаил Присяжнай иһитиннэрэр.
«Өрөспүүбүлүкэ үрдүк үөрэхтэригэр уонна профессиональнай үөрэхтээһин тэрилтэлэригэр, үөрэхтээһин туох бары араҥаларыгар, уопсайа 986 сыаллаах миэстэ быйыл көрүлүннэ. Эмчиттэри бэлэмнээһиҥҥэ 264 тус сыаллаах миэстэ ааҕылынна», - диэн Присяжнай бэлиэтиир.
Тус сыаллаах миэстэҕэ үөрэххэ ылыы, каадыр тиийбэт буолуутун кыһалҕатын туоратар сыалтан, «Доруобуйа харыстабыла» национальнай бырайыак чэрчитинэн ыытылларын миниистири солбуйааччы чопчулаата.
Бастакы саньытаарынай- мэдиссинискэй көмөнү оҥорор тэрилтэлэргэ сытыытык турбут каадыр тиийбэт кыһалҕатын туоратыы - бу Арассыыйа бэрэсидьиэнэ Владимир Путин «Доруобуйа харыстабыла» национальнай бырайыакка туруорбут инники күөҥҥэ сылдьар садааччаларыттан биирдэстэрэ. Ол быһыытынан, мэдиссиинэ үлэлиир саастаах нэһилиэнньэ араас ыарыыттан өлүүтүн таһыма лаппа түһэрин ситиһиэхтээх, сылга бииртэн кырата суох мэдэссиинэ кэтээн-чинчийэн көрүүнү олоххо киллэриэхтээх.
2019-2024 сылларга Арассыыйа үрдүнэн былааннаммыт национальнай бырайыагы олоххо киллэрэргэ 1,7 триллион солк. харчы туһаныллара күүтүллэр.
