Бүтэһик 4 күҥҥэ Саха сиригэр хамсык тарҕаныыта эмиэ улаатта. Аҥардас ааспыт сууккаҕа эбии 49 киһи ыалдьыбыта бигэргэммит.
Ол курдук, Дьокуускайга – 33. Алдаҥҥа – 3. Мэҥэ Хаҥаласка — 2. Үөһээ Бүлүүгэ, Ленскэйгэ, Мииринэйгэ, Нерюнгрига, Ньурбаҕа, Өймөкөөҥҥө, Тааттаҕа, Уус Алдаҥҥа уонна Чурапчыга – 1.
Билигин 647 киһи эмтэнэ сытар, олортон 72 – оҕолор. Ордук 18-25 саастаах ыччаттар уонна 60 ааспыт дьон ыалдьаллар. Эргиэн үлэһиттэрэ ордук хаптараллар эбит. Онуоха кинилэр санитарнай-эпидемиологическэй нуорманы тутуспаттара сүрүн биричиинэннэн буолар.
Киин куоракка ыарыһах элбии турарынан, суһал ыстаап куойка ахсаанын элбэтэргэ быһаарыммыт. Өрөспүүбүлүкэҕэ билигин куойка 30% резервэҕэ турар. Дьокуускайга куойка 20%-на босхо турар.
Вакцинация күүскэ ыытыллан бара турар. Кулун тутар 15 күнүгэр 2400 эбии вакцина кэлбит. Ааспыт өрөбүллэргэ эбии 1200 кэлбит, ону барытын тарҕаппыттар. "ЭпиВакКорона" вакцина хараллара судургу буолан, дьиэҕэ олорор дьоҥҥо уонна ыраах сиргэ биригээдэлэр тиийэн быһыыны туруоралларыгар кылаабынай быраастарга бу вакцинаны туһаналларыгар сорудахтаабыттар.
Хамсык туруга эмиэ хаахтыйан эрэринэн, Өрөспүүбүлүкэ күнүн уонна ыам ыйын 1 күнүн бырааһынньыктара хааччахтаахтык барыахтарын сөп. Маннык хааччахтар ыарыы ордук тарҕаммыт сирдэригэр туһаныллыахтара.
Бу туһунан доруобуйа харыстабылын миниистирин бастакы солбуйааччы Алексей Яковлев кэпсээтэ.
