Бэҕэһээ социальнай ситимнэргэ норуот сөбүлээн көрбүт «Чээкэ» киинэ актерун биллибэт киһи кырбыы сылдьарын туһунан видео тарҕаммыта. "Кини миигин уончата охсубута. Бэл, ГИБДД үлэһиттэрэ көрөн турдахтарына. Тохтоон кэлэ-кэлэ, хаста да саба түспүтэ", - диэн Анатолий Кириллин кэпсиир. Кини "саамай дьиктитэ баар - ГИБДД үлэһиттэрэ миигин бэйэбин буруйдаах оҥорбуттара, кини саба түһүүлэрин боротокуолга биир да тылынан ахтыбатахтара”диир.
Билигин Анатолий хараҕар эчэйиилээх, төбө ыарыыта эрэйдиирин этэр. "Ол эрээри тыыннаахпын, мэйиим доргуйбатах курдук", - диэн эрдийэр кини.
Видеоҕа көстөрүнэн, орто саастаах эр киһи Кириллиҥҥэ саба түһэр. Суруналыыстар быһаарбыттарынан, маҕан өҥнөөх «Hyunday Greta» уруулугар «Дьокуускайдааҕы Утилизационнай Киин» ХЭТ салайааччыта Марк Тихонов олорбут. Массыынатын соторутааҕыта атыыласпыт.
«Мин иһиттэхпинэ, эргэ массыына эбитэ буоллар бырастыы гыныам этэ диирэ. Ол эрээри саҥа массыыналаах эрээри тоҕо кэлэн соруйан миэхэ кэтиллэр?», -диэн актер бэркиһиир.
- Барыта Курнатовскай уонна Хатыҥ Үрэх суолларын быһа охсуһуутугар саҕаламмыта, мин бэйэм суолум салаатыгар турбутум. Суол бэлиэтэ миэхэ уҥа эбэтэр хаҥас диэки барарбар ыйара, оттон кини суол хаҥас өртүгэр турара, онтон сиэттэрэн хаҥас эрэ диэки барыахтааҕа, суол быраабылатын быһыытынан. Мин от күөх уот умайбытыгар көнөтүк барбытым, оттон кини хаҥас барыан оннугар эмискэ утары суолга тахсан миигин ситэн иннибэр баар буола түспүтэ. Өссө кыыһыран сигналлаабыта. Мин дьиибэргээн, суол быраабылатын билбэт эбит диэн кыһамматаҕым. Хас киһини кытта аахсан. Түмүгэр кини биһи кэннибититтэн айаннаабыта. Массыына аҕыйаабытыгар ситэн ылбыта. Уонна массыынатын көлүөһэтинэн мин массыынам ойоҕоһун таарыйбыта. Кини бастаан миигин таарыйбыта. Ол кэннэ күөйэн-хаайан тохтуурга күһэйбитэ.
Мин соһуччута бэрдиттэн иннибэр тохтообут массыынаны алҕас фаарабынан кини бамперын таарыйбытым. Тахсан истэхпинэ кини суол саахала буолбут сириттэн тэйэн суол кытыытыгар тохтообута. Быһаарсаары тиийбиппэр кини сирэйгэ охсубута, мин бу киһи куһаҕан кэмэлдьилээҕин билэн эргиллэн барбытым.
Кэннибититтэн хата биллиилээх суруналыыс Владислав Коротов айаннаан испит эбит. Быһылааны көрөн тохтообута. Биһиги аахса турар кэммитигэр Тихонов миигин харахха саайбыта. Дьолго, Коротов бу кэмҥэ төлөппүөнүн видеокамератын холбообута. Суруналыыс устар турарын көрөн саба түһээччи аны киниэхэ ыстанан тиийэн: «Мин эһигини өлөрүөм. Эһиги олорон бүттүгүт. Эһи билбэккит мин ким буоларбын. Видеоны таһаардыгыт да өлөҕүт!», - суоһурҕаныы бөҕөтө буолбута.
ДПС массыыната тохтообута. Туох буолбутун ыйыппыттара. Докумуоммутун бэрэбиэркэлээбиттэрэ. Быһылаан схематын оҥорор кэмнэригэр Тихонов биир кэм төлөппүөнүгэр хатанан турбута, бэйэтин билсиилээхтэригэр эрийэрэ.
Бу кэнниттэн миигин полиция отделынан, балыыһанан, ГИБДД-га өр сырытыннарбыттара, тоҕо диэтэххэ утарсааччым миигин итирик сылдьыбыт диэбит этэ. Онон наркологияҕа медиссиинэ туоһулааһынын барарга күһэллибитим. Соһуйуом иһин, Тихоновы оннукка тургутууга ыыппатахтар этэ. Маннык кыра аайыттан киһиэхэ сутуругунан түһүөр диэри кыйаханыы тугу эрэ уорбалыырга – сүрүн төрүөт. ДТП чааһыгар миигин буруйдаах оҥорбуттара, тоҕо диэтэххэ мин кини массыынатын кэнниттэн тиийэн таарыйбыт аатырбытым. ГИБДД үлэһиттэрэ бэл кинилэр көрөн турдахтарына киһи киһини кырбыы турбутун туһунан боротокуолларыгар биир да тыл суох. Маннык буолуохтааҕын курдук. Иирэ кыйахаммыт киһини мэдиссиинэ туоһулааһыныгар эмиэ ыытыахтаахтар этэ. Ону баара тута дьиэтигэр ыытан кэбиспиттэрэ.
Арба, айдаан кэмигэр аттынааҕы саунаттан эдэр уол тахсан, кинилэргэ видеокамера баарын туһунан иһитиннэрбитэ. Миэхэ хааммын сууйарга көҥүллээбитэ. Ону таһынан видеокамератттан устууну телефоҥҥа устарга тыл көтөхпүтэ. Онуоха Тихонов көтөн түһэн: «Видеоны үчүгэйинэн сотторун. Кэлиэҕим - бэрэбиэркэлиэҕим». Бэйэтин ньүдьү-балайдык туттара-хаптара.
Ол иһин мин бүгүн Саха сирин Силиэстийэлиир Кэмитиэтигэр сайабылыанньа суруйарга сананным. Маннык киһини уодьуганнаатахха сатанар. Ботуруул кэлбэтэҕэ буоллар кини миигин илдьи кырбыыра хаалбыта. ГИБДД үлэһиттэриттэн арыый туттуннаҕа. Ол эрээри кинилэр баалларына сааммыта. Мин оннооҕор үүнэ-тэһиинэ суох 90 сс сыллары санаатахпына бу курдук быһыы суоҕа.
Билигин мин бу дьыаланы таах «саптарыахтара» дии саныыбын. Этэллэринэн, киниэхэ элбэх үрдүк сололоох аймахтардаах үһү. Мин уолум Филипп Кириллин икки сыллааҕыта оҕоҕо саба түспүт бандьыыты туппута. Оттон билигин мин бэйэм бандьыыттан атаҕастанным.
