Муус устар 22 күнүттэн 27 күнүгэр диэри Новосибирскай куоракка сыл ахсын ыытыллар устудьуоннар норуоттар икки ардыларынааҕы научнай конференциялара буолан ааста. Бу конференция номнуо 56-с төгүлүн ыытыллар. Хотугулуу-Илиҥҥи федеральнай университеттан уопсайа 30 устудьуон кыттыыны ылла.
Ол курдук, Скрябина С.П. (ФЛФ), Куприянов К.Е., Федотов Н.Е. (ЮФ), Аргунова К.В. (ИЯКН) 2-с истиэпэннээх, Томская А.Е. (ФТИ), Лепчикова С.П. (ПИ), Степанова А.Н. (ЮФ), Винокурова Н.П., Адамова Т.В. (ФЭИ), Павлов Нь.И. (ИЗФиР), Егасов Р.В. (ИЕН), Дорофеева Л.А., Гурьева М.И., Захарова М.В (ФЛФ), Ильина А.А., Сеялова Е.В., Панькова С., Попова Е.П. (ФЛФ), Адамова С.И., Захарова А.В., Божедонова А.Е. (ИЯКН) 3-с истиэпэннээх дьупулуомнарынан наҕараадаланнылар. Саха сирин дэлэгээссийэтиттэн Сатанар М.Т. “Олонхо в интегративной парадигме” диэн тиэмэнэн кыттан кыайыылаах үрдүк аатын сүктэ.
Конференция биир нэдиэлэ устата ыытыллынна. Ол тухары олус интэриэһинэй тэрээһиннэр буоллулар. Ол курдук, муус устар 22 күнүгэр 56-с төгүлүн ыытыллар устудьуоннар норуоттар икки ардыларынааҕы конференцияларын үөрүүлээх аһыллыытыгар, Новосибирскай судаарыстыбаннай университетын ректора, РАН чилиэн-корреспондена, физико-математическай наука доктора, профессор – тэрийэр комитет бэрэссэдээтэлэ Михаил Петрович Федорук уо.д.а. ыалдьыттар тыл эттилэр. Үгэс курдук, физико-математическай наука доктора, РАН академига, СО РАН С.С. Кутателадзе аатынан теплофизика институтун салайааччыта Сергей Владимирович Алексеенко “Тенденции и перспективы развития энергетики” диэн олус интэриэһинэй лиэксийэни аахпыта. Ону таһынан араас экскурсиялар, “Что? Где? Когда?” интеллектуальнай оонньуулар, лекциялар, семинардар уо.д.а. ыытылыннылар.
Олус интэриэһинэй, үрдүк таһаарыылаах тэрээһиҥҥэ сылдьан кэллибит. Тапталлаах университеппытыгар махталбыт муҥура суох.
Айяна Филиппова
