Киирии

Киирии

Алмаастаах хампаанньа көтөр аалларын хампаанньата сэбиэскэй норуот чаҕылхай уонна хорсун быһыытын үтүө өйдөбүллэригэр бу дьыл ыам ыйын 7 күнүгэр аатырбыт ТУ-154 85684 «ИЖМА» сөмөлүөтэ Москуба – Сочи – Москуба эриэйсэни оҥоруо.

«АЛРОСА» авиа-хампаанньа бэрэстэбиитэлэ Татьяна Литвинова эппитинэн, бу эриэйсэ уратыта: пассажирдар менюларыгар «наркомовскай 100 грамм» киирсэр, бортпроводниктар анал пуормаланаллар, көтөн тахсыыга уонна түһүүгэ байыаннай кэм ырыалара тыаһыахтара уонна устуоруйа чахчыларыттан билиһиннэриэхтэрэ.

ТУ-154 85684 «ИЖМА» 2010 сыл балаҕан ыйын 7 күнүгэр саахалланар куттал суоһаан Коми Өрөспүүбүлүкэтин Ижма аэродромугар түһэргэ күһэллибиттээх. Онтон сэдиптээн «ИЖМА» диэн сүрэхтэммитэ. Маннык көрүҥ сөмөлүөттэр түһэллэригэр сөбө суох, туһаттан былыр үйэҕэ тахсыбыт балаһаҕа түһэн тыыннаах хаалбыттара. Кытаанах сиргэ үктэнэн баран, балаһаны таһынан тахсан, көтөр аал өссө да 168 м мастар, талахтар быыстарынан тоҕо солоон тохтообута. Дьолго, ким да эмсэҕэлээбэтэҕэ, көтөр аал алдьаныыта да кыра этэ. Кэлин сөмөлүөтү өрөмүөннээн, чөлүгэр түһэрбиттэрэ. Онтон бэттэх күн бүгүнүгэр диэри дьону таһа сылдьар. 2010 сыл алтынньы 8 күнүгэр дойду оччотооҕу бэрэсидьиэнэ Дмитрий Медведев экипаж хамандыыра Евгений Новосёловка уонна иккис пилот Андрей Ламановка Арассыыйа Дьоруойа ааты иҥэрбитэ. Экипаж атын чилиэннэригэр (штурмаҥҥа, бортинженергэ уонна бортпроводниктарга) Хорсун Быһыы уордьаны анаабыттара.

Бу быһылаан буолбутун кэнниттэн иннэ олоҕуран, «Ёлки 2» киинэ уһуллубута. Экипаж хамандыырын – Алексей Петренко, иккис пилоту Павел Баршак оонньообуттара. Сюжет быһыытынан, алдьаныылаах Ту-154 көтөр аалы быраҕыллыбыт аэродромҥа түһэрэллэр. Киэҥ дуолга прибор үлэлээбэт, балаһа хайдах туруктааҕа биллибэт усулуобуйатыгар кинилэр эмиэ ыстакааннаах ууну ыйынньык оҥостоллоро кэпсэнэр. Кинилэр дьоллоругар, тустаах балаһаны авиация эрэдэбиэй үлэһитэ туттуллубакка сыппыт кэмнэригэр көрө-истэ, харайа сылдьыбыта быыһыыр. Кини уобараһа дьиҥ олоххо баар дьоруой Сергей Сотников буолар. Кини “Ижма” аэропорт сабыллыбытын кэннэ 12 сыл устата балаһа бөҕүнэн-сыыһынан бүрүллүбэккэ, көтөр аал түһэригэр-көтөрүгэр сөптөөх гына харайан илдьэ сылдьыбыт. Кини ити кыһамньылаах, эппиэтинэстээх үлэтэ сыаналанан, 2012 с. “Аҕа дойдутун иннигэр үтүөлэрин иһин” II истиэпэннээх уордьанынан наҕараадаламмыта.

Дмитрий МИХАЙЛОВ.

Тарҕат:

Комментарии

Защитный код Обновить