Бу сэдэх хаартысканы Иркутскай түмэлиттэн биһиги үлэһиппит А.П. Абрамов булан аҕалбыта.1928 с. Иркутскайга үөрэнэр устудьуоннар уонна Саха сириттэн төрүттээх үлэһиттэр түспүттэр.
Хаартыскаттан көрдөххө, син балачча киһи ол кэмҥэ Илин Сибиир киин куоратыгар үлэлииллэр, үөрэнэллэр эбит. Үһүс эрээккэ уҥаттан бэһис саха биллиилээх учуонайа, этнограф, быйыл 130 сааһын бэлиэтиир Г.В. Ксенофонтовпыт олорор. Кини ити кэмҥэ Иркутскайга олоро, үлэлии кэлбит. Сүрдээх таһаарыылаахтык үлэлээбит, билиминэн утумнаахтык дьарыктаммыт, элбэх дакылааттары оҥорбут, ыстатыйалары суруйталаабыт.1937 с. сүрүн үлэтин – “Урааҥхай сахаларын” Иркутскайга таһаарбыт.
Төрдүс эрээккэ уҥаттан бэһис саха норуодунай поэта, эдэркээн В.М. Новиков-Күннүк Уурастырап турар.
Ити кэмҥэ үөрэммит биллиилээх суруйааччы Н.Н. Павлов – Тыаһыт 3 эрээккэ уҥаттан сэттис олорор. Иккис эрээккэ уҥаттан үһүс мин учууталым, Мэҥэ Мооругуттан төрүттээх В.И. Сосин олорор. Бука бу хаартыскаҕа үгүс биллиилээх дьон түстэхтэрэ буолуо. Хомойуох иһин, үгүстэрин билбэппит. Онон ааҕаачылартан көрдөһөбүт – билэр дьоҥҥутун биһиэхэ биллэрдэргит. Бу землячество үгүс үлэни ыытар эбит. Ол курдук, Иркутскай түмэлигэр экспонаттары хомуйан туттарбыт, кыраайы үөрэтиинэн дьарыктаммыттар. Төл. 34-35-27.
Е. Шишигин,
Саха Түмэлин дириэктэрэ
