120 тыh. солк. хамнаска алмаастаах Накыын ыҥырар!

Баахта дьоно "АЛРОСА" салгын суудуналарыгар олорсон Мииринэйтэн Накыын туhаайыытыгар айанныыллар. Айан соччо уhуна суох.Накыын оччугуй аэробылаhааккатыгар «АН-38» көтөр аала тириэрдэр. Нэhиилэ сырдьыгыныыр «МИ-8» курдук буолбатах, «АН-38» быдан түргэн. Накыыннаан иhэн, кими эрэ кытары кэпсэтиэм диэн саараама: бары, суудуна иhигэр киирээт да утуйан дуугунатан хаалаллар.

Бу дьон үлэлиир миэстэлэригэр кэллилэр да, түүннэри-күнүстэри түбүктээх үлэ үрдүгэр түһэллэр. Онон түгэн көһүннэр эрэ күүс-уох мунньуналлар.Мииринэйтэн Накыын урууда баайдаах сиригэр диэри ый ахсын баахта дьоно тиийэллэр.Ньурба хайаны байытар кэмбинээтигэр ааспыт сылга орто хамнастара – 120 тыhыынча солк. тэҥнэспит. Онон үлэһиттэр сэргэхтэр.

Итинник үрдүк хамнаска биллэн турар, идэтийиилээх, «Ньурба», «Ботуобуйа» карьердарга, 15, 16№-дээх баабырыкаларга, ЦРГТО, технологическай тэриэбэ маастардара, уо.д.а улаханнык тиритэр-хорутар дьон сылдьаллар.

Накыыҥҥа үлэлиир дьону “Цех обеспечения производства” диэн хааччыйыы салаата үлэлиир. Кинилэр хамнастара арыый кыра эрээри, бириэмийэлэрэ улахан. Хайаны байытар кэмбинээт таhаарыылаахтык үлэлээбит сылыгар бириэмийэ баҕас тос курдук бэриллэр.

Карьердарга быйыл сааскыттан ыла үлэ харгыһа суох барар. Кыhын сүрүннээн дэлби тэптэрэр, боруоданы сааhылыыр үлэлэр ыытыллар эбит буоллахтарына, билигин урууданы баабырыка утумугар тиэйии барар.

Быйыл сайын кылгас болдьоххо үлэлиир 15-с №-дээх баабырыка эмиэ алмаастаах кумахтары байытыынан дьарыктаныа.Маннык баабырыка кыhынын үлэлээбэт.

Билигин Накыын учаастагар олох-дьаhах биллэ тубуста. ВОС (ууну ыраастыыр утум), ЦРГТО (хайа тиэхиньикэтин «тилиннэрэр сир), АБК тутулуннулар. АБКларыгар, сыннньанар хос баар.

Спордунан дьарыктаналларыгар тренажер арааhа баар.Аны манна аныгы эмтиир технологиялаах мэдэссиинэ пууннаахтар.Хас биирдии үлэhит хаан баттааhынын, сүрэх-тымыр туругун бэрэбиэркэлэтэр.Кыратык да ыарытыйбыт киhи симиэнэттэн босхолонор. Остолобуой тутуллан минньигэс амтаннаах, тотоойу аhынан үссэнэллэр.Манна эбии бородуукта уонна табаар лааппыта, буфет баар.

НХБК дириэктэрэ В.Курнев «баахта үлэhитэ куруук тот сылдьарын туhугар асчыттартан кытаанахтык ирдиибит» диэн турардаах.Дириэктэр симиэнэ кэнниттэн оробуочайдар суунар сирдэрин улаатыннарарга этии киллэрбитэ.

Баахтабыыктар олорор уопсайдарыгар, хастыы эмэ буолбакка, икки киhи олорор усулуобуйатын тэрийбитэ.

Манна православнай таҥара дьиэтэ, бибиэтиэкэ, тэлэбиисэр көрөр анал сир кытары баар.Суотабай сибээс, интэриниэт үчүгэйдик хабар.АБКтан Ньурба ХБК дириэксийэтигэр «скайпынан» тахсаллар. Суhал мунньах эмиэ «скайпынан» барар.Накыын – Саха сирин уонна Уhук Илин баахтабай учаастактартан биир саамай ордуктара.Накыын бу ситиhиитин уонна производство бэртээхэй түмүктэрин учуоттаан, Ньурба ХБК 2017 сыллаахха «АЛРОСА» үрдүнэн саамай чулуу кэмбинээтинэн ааттаммыта.Бу бырамыысалыннастаах учаастак төһө да усулуобуйата үчүгэйин иhин, сорох саха дьоно ол диэки бара сатаабаттар эбит.Ордук производствоны хааччыйар салаа үлэhиттэрэ тийбэттэр.

Онон үлэ миэстэлэрэ тахсан кэлэ тураллар.

Холобур, бу сааhы быhа, Ньурба ХБК, Накыын бырамыысалыннастаах учаастагар муоста сууйаччылар наадалар диэн биллэрдилэр. Булбатылар.

Ньурба улууhуттан интэриэс соччо суох.Арааһа хамнастарын мыыналлар быһыылаах.45-50 тыhыынчаны, «дойдубутугар да ылыллар ини» дииллэр дуу? Саарбахтыыбын.

Аны билигин Накыын учаастагар эбийиэктэри хонтуруоллуур салайааччы наада буолбут.

Хамнаhа – 70 тыhыынча солк. буолуо диэбиттэр. Итиннэ бириэмийэ эбиллэр түгэнигэр, киһи соччо мыымат хамнаһа тахсар. Дьэ, итиннэ ким эмит барыа дуо? «Быыла суох» идэ эбээт.

Биhиги, суруналыыстар дьыалабыт – иhитиннэрии-биллэрии буолар. Оттон эhиги үлэ миэстэлэрин уталыппакка ыйыталаhа тураргыт буоллар.  

Станислав Алексеев, Мииринэй куорат.

Ньурба ХБК архыыбын уонна Слава Gelio Степанов фотолара.