Киирии

Киирии

Биллэн турар, хас биирдиибит саамай ыалдьар боппуруоспут – хайдах-туох кыстыырбыт, дьиэ-уот, хомунаалынай хаhаайыстыба туруга. Мииринэйгэ, бэлиэтээн эттэххэ, 1978 сыллаахха тутуллубут хочуолунайдаах, 16 тепло-пууннаах олоробут. Бу тепло-пууннартан 2017 сыллаахха биирдэрэ эрэ уларытылынна. Атыттара сэбиэскэй кэмнэртэн ыла тураахтыыллар. Куорат устун туора-маары тэнийбит, 2,8 биэрэстэлээх уу уонна ититии утумнарыттан дуона суох бырыhыана абырахтанна.

Мииринэй оройуонугар былыргыта ПЭТСиЖХ, аныгыта ПТВС күн бүгүнүгэр диэри үлэлээн кэллэ. ПТВСы салайбыт Клим Антонов куорат баhылыгынан талыллан, кини оннугар Сергей Дадычин дириэктэринэн үлэлиир. Алмазнай, Арыылаах ДьУоХХтын эмиэ ПТВС дьаhайар. Дьэ бу курдук сытыы боппуруоска дьон туох санаалаах-оноолоох эбитий?

Мииринэй куоратын олохтоохторо тугу дииллэрий?

В.Григорьев: Чааhынай дьиэлээхпин. Миигин ордук Куорат кытыытын иhэр уунан хааччыйар кубовайдарбыт туруктара долгутар. Урут кубовайдартан босхо уу бастан ылар этибит. Кэлин онтубутун хататалаан кэбиспиттэрэ. Билигин уубут сыаната үрдээн турар. Ырааhырдыы, бөҕү тиэйии-таһыы эмиэ тус бэйэбит эрэ кыһалҕабыт буолан турар. Бөх быыһыгар олоробут. Ким да хомуйбат. Олохтоох былаастар куорат кытыытын эргин субуотунньук ыыталлара буоллар диэн баҕа санаалаахпын. Манна хаhаайыннар ол туһунан кумаардаан да көрбөттөр. Бэйэм хомуйа сатаатахпына ким да кыттыспат. Тугу эмит эттэххэ сүгүн да кэпсэппэттэр.

mir1

В.Коваленко: Ленинград бэрэспиэгэр 1967 сыллаахха тутуллубут «хрущевка» дьиэлэригэр олоробун. Дьиэбит анна кыhын-саас лаhыр муус буолар. Турбалартан уhун кыhыны быhа уу саккыраата. Дьиэттэн тахсааккын кытары муус килиэ буолааччы. Бары мантан олус эрэйдэнэбит. Хомунаалынай систиэмэбит дьаабы. Барыта тохто, тэстэ турар. Кыһалҕалаах боппуруоспутун бэйэбит эрэ быhаарар кэммит кэлбит быhыылаах.

А.Попов: Алмаас хостонуутун бастакы сылларыгар тутуллубут мас (Жигаловский дом) дьиэлэригэр олоробун. Дьиэбит акылаата сытыйбыта балачча кэм буолла. Маны «оттайка ледяной линзы» диэн ааттыыллар эбит. Акылаата бокуйан, дьиэбит тиэрэ хаадьайан турара дьаабы. Улахан эрэйинэн, хаарбах туруктаах дьиэлэр испииhэктэригэр киллэртэрбиппит. Көһөрөллөрүн күүтэбит. Мас дьиэбит электро-боруобаттара былыргыттан турар буолан, эрэбиллэрэ суохтар. Ханнык эрэ фирма баhаары сэрэтэр, буруо тахсар түбэлтэтигэр сигнал биэрэр, «GSM» датчиктарынан дьарыктанар эбит. Мииринэй куорат хас биирдии мас дьиэтигэр маннык датчиктары туруорталыахтара диэбиттэрэ да, хамсааhын бара илик.

mir2

М.Малышева: Эдэр куорат диэтэххэ, Мииринэй кэлин хаарбах туруктанна. Туох баар ититиитин, уутун-хаарын утумнара барбах сыыгыныыллар» Хотугулуу-Илин хочуолунайы «АЛРОСА» састаабыгар хааллардыннар диэн куорат олохтоохторо бырабыыталыстыба отчуоттарыгар, хаhаайыстыбаннай актыыптарга элэ-была тылларын этиммиттэрэ. Онтулара син туолла. «ПТВС» хампаанньабытыгар кыттыгас тэрилтэнэн хаалла. Бу маннык дьаһаммыттара арыый да эрэбиллээх буолла.

Н.Самойлов: Мииринэйи АЛРОСА тутан олорор буолан эрэ сэниэтик олороллор. ДьУоХХ букатын сайдыбат. Сантехниктар кыамматтар. Билигин балаhыанньа өссө да уустугурар кутталлаах.

В.Ильин: Мииринэй оройуонун үрдүнэн 10 сир баайын туhанааччы баара бэлиэтэммитэ. Мииринэй куоратыгар АЛРОСАны таhынан икки улахан бырамыысыланнас тэрилтэтэ баар: “Якутскэнерго” уонна “РНГ” (“Роснефть”). Энергетиктэр уоппутун син хааччыйан олорор буоллахтарына, «РНГ» эмиэ дьэ субу сотору туhалыа дииллэр. Ньиэп-гаас тэрилтэлэрин суоттарыгар оройуоммутугар олоххо наадалаах эбийиэги туттарыахха наада. Дьон сынньанар сирин — Чуоналыыр, «Алмаастаах хочо» тыаларын «Сүлдьүкээрнефть» ылан эрэр диэбиттэрэ. Оччотугар, ойуурдаах, мастаах-оттоох, ыраас салгыннаах, уулаах сынньанар сир баар буолара тирээн кэлэр. Мээрбит Клим Антонов "Заречнайы дьон маассабайдык сынньанар сиригэр кубулутуохха" диэбитин сэргии иhиттим. Иирэлээх үрэххэ пляж да баар буоллун ээ. Манна анаан үбү-харчыны ньиэп-гаас тэрилтэлэриттэн төлөттөрүөххэ наада.

mir3

Н.Юрченко: Бэйэм Иркутскайтан кэлбитим. Мииринэй куорат эргэ дьиэтэ баhыйбыт. Мас дьиэтэ элбэх эбит. Икки сыл кыстаатыбыт. Эчи, хомунаалка, бэйэтэ ГЭСтээх сир диэтэххэ, уот төлөбүрүн сыаналара ыараханын! Ас-үөл туhунан этэ да барыллыбат. Yрдyк хамнастаах киhи эрэ олорор куората эбит.

Станислав Алексеев ыйыталаста.

Мииринэй куорат. Ааптар хаартыскалара.

Тарҕат:

Ырытыыгын суруй

Защитный код
Обновить

Бүтэһик сонуннар