Ыам ыйын 18 күнүгэр Ил Дархан Егор Борисов суруналыыстары кытта көрсүһүүтүгэр балаһыанньа билигин даҕаны уустугун туһунан иһитиннэрдэ.
“Өрөспүүбүлүкэ 8 улууһугар ыксаллаах быһыы-майгы биллэриллэн турар. Амма өрүс таһымнаата. 1635 уһаайба, 829 дьиэ ууга былдьанна. 3349 киһи аһаҕас халлаан анныгар хаалла. Күн бүгүн Чурапчыга Быраада, Куоҕалы үрэхтэр таһынан бараннар, 1980 сыллааҕы уу кэлэр куттала үөскээтэ. Оччолорго Чурапчы уонна Ытык Күөл нэһилиэнньэлээх пууннара бүтүннүү ууга былдьанан тураллар. Уу саппааһа олус элбэх. Өтөрүнэн буолбатах быһыы-майгы таҕыста. Айылҕа улуу күүһүттэн тахсыбыт иэдээни туоратарга кыахпыт баарынан охсуһабыт”, — диир Ил Дархан.
Билиҥҥитэ Уус Майдаҕа, Аммаҕа уонна Тааттаҕа уу түстэ. Инникитин чөлүгэр түһэрии түбүгэ күүтэр. Онуоха Бырабыыталыстыба 3 мөл. солк. көрдө. Аммаҕа нэһилиэктэр икки ардыларынааҕы суоллары чөлүгэр түһэриигэ күүстээх үлэ бара турар. Иэдээҥҥэ түбэспит дьоҥҥо ас, таҥас, эмп-томп тиэрдилиннэ. Биир дойдулаахтар түмсүүлэрэ, тэрилтэлэр, ыччат хамсааһыннара, биирдиилээн дьон көмөҕө илиитин уунан, күннэтэ араас көрүҥнээх көмө киирэ турар. Ыам ыйыгар дьон хамнаһын, көмө харчыны илиилэригэр тутуохтара диэн Ил Дархан эрэннэрэр.
Күн бүгүн өрөспүүбүлүкэҕэ тутуу матырыйаала татым. Ол да буоллар, дьон дьиэтин өрөмүөннэнэригэр туһааннаах матырыйааллары булууга бары хайысханан үлэ ыытыллар. Киин ититиигэ турар дьиэлэргэ оттук сезона уһатылынна.
– Ууга былдьаммыт нэһилиэк ахсын дьоҥҥо дьаһалта өттүттэн сэрэтии суоҕун туһунан бассаап ситиминэн сымыйа сурах тарҕанар. Өссө төгүл тоһоҕолуубун: дьон сэрэтиллибитэ. Саха дьоно барыта этэҥҥэ ааһарыгар, иэдээн биһигини эрэ тумнуон сөбүн туһунан арыт толкуйдуубут. Миэстэтигэр налыйан, өсөһөн олорон биэрии түгэннэрэ тахсыталаатылар. Чахчы, улахан уу кэллэ. Маннык түгэҥҥэ буруйдааҕы көрдүү, бэйэ бэйэни хоруотаһа сатаабакка, иэдээни туоратыыга түһүнүөхпүтүн наада. Прокуратура быһылаан биричиинэтин үөрэтэр, буруйдаахтар баар буоллахтарына, сөптөөх миэрэҕэ тардыллыахтара, — диэн Егор Борисов этиитин тоһоҕолоото.
Бу иннинээҕи көрсүһүүлэргэ Ил Дархан Аммаҕа ыытыллыахтаах Саха сирин спортивнай оонньуулара кэлэр сылга көһөрүллүбүтүн туһунан иһитиннэрбитэ. Оттон норуоттар икки ардыларынааҕы таһымнаах тэрээһиннэр кэмигэр ыытыллыахтара.
Оксана ЖИРКОВА.
