Алмаастаах кыраай киин куоратыгар – Мииринэйгэ, кыаммат-түгэммэт ыал оҕолоро “Харысхал” ыччаты өйүүр кииҥҥэ сылдьаллар.
Манна кинилэр күҥҥэ биэстэ тото-хана аһыыллар, соноторуй тииптээх чэбигирдиини ааһаллар, талан ылбыт куруһуоктарыгар дьарыктаналлар. “Харысхал” үлэһиттэрэ оҕолору саататаллар, тыйаатырга, киинэҕэ босхо сырытыннараллар. Быһата, дьиэ кэргэннэригэр ылбат иитиилэрин ситэрэн биэрэллэр. Маны таһынан, киин бииргэ үлэлэһэр тэрилтэлэрэ бэлэх-туһах биэрэллэр, араас тэрээһиннэри ыыталлар.
Кииҥҥэ баар оҕолору кытары эмчиттэр, уйулҕа үөрэхтээхтэрэ кыраҕытык кэтээн көрөллөр. “Харысхал” саҥа тупсаҕай тутуулаах дьиэтин СӨ Бырабыыталыстыбата үбүлээн туттарар (Үүнэр көлүөнэ пуондата). Билиҥҥитэ саҥа дьиэ тас бараана номнуо ситтэ, аны ис үлэтин ыытыахтара. Тутааччылар эбийиэги аны күһүн үлэҕэ киллэрэр былааннаахтар.
Станислав Алексеев, Мииринэй к.
Ааптар хаартыската.
