Киирии

Киирии

Мииринэй куораты уунан, ититиинэн хааччыйар тэрилтэ «ООО ПТВС» («Предприятие тепловодоснабжения») диэн ааттаах. Дириэктэринэн иккис сылын Сергей Дадычин үлэлиир.

ПТВС хонтуруолун иhигэр куораты бүтүннүүтүн сылааhынан хааччыйар киин хочуолунайдар («Северо-Восточная котельная») Алмазнайга уонна Арыылаахха бааллар.

Тутаах эбийиэктэр - иhэр уунан хааччыйыы, киртэн-хохтон ууну ыраастыыр утум, быртахтаах ууну тэйиччи утаарар канализация ситимнэрэ буолаллар. Маны барытын хааччыйыыга 808 киһи үлэлиир. Күннээҕи түбүктэрэ улахан.

Мииринэй куораты уонна аттынааҕы нэһилиэктэргэ – Алмазнайга уонна Арыылаахха ууну, ититиини биэрии – кинилэр сүрүн соруктара. Дьокуускайы кытары холоотоххо, ититии уонна уу мииринэйдэр дьиэлэригэр эрдэ кэлээччи. Билигин даҕаны сылааһынан хааччыйыы бэс ыйын 1-2 күннэригэр диэри тохтуо суоҕа диэн иһитиннэрэллэр.

mir

ПТВС быыhанна

Икки сыллааҕыта ПТВС «профильнайа суох актыып» буолан, АЛРОСА састаабыттан таhаарыллыбыта. Хампаанньаттан үбүлэнэр тэрилтэ инники дьылҕатыгар быыһык кэм тосхойбута. Биллэн турар, олохтоохтор мантан улаханнык долгуйбуттара. Кинилэр сылааhынан, итии-тымныы уунан куораты уонна АЛРОСА эбийиэктэрин хааччыйар тэрилтэни “хампаанньа састаабыгар хаалларыахха” диэн туруорсубуттара.

Норуот туруорсарын учуоттаан, хампаанньа ПТВСы самалык («Дочернее предприятие») тэрилтэ быһыытынан хаалларда. Олохтоохтор дьэ «hуу» эрэ дэhээхтээтибит.

mir1

Хотугулуу-Илиҥҥи хочуолунай

Алмаастаах кыраай киинин сылааhынан хааччыйар гааһынан оттуллар Хотугулуу-Илиҥҥи хочуолунай, итиэннэ 16 теплопуун баар.   1978 сыллаахха тутуллубут хочуолунайга саахал тахсар түбэлтэтигэр, сэрэххэ диэн, биир суукка тулуhар диисэл ыстаансыйалаахтар.                  

Ити курдук, Хотугулуу-Илиҥҥи хочуолунай биhиги нус-хас олохпутугар улахан оруоллаах, бырамыысыланнаска да быhаччы сыhыаннаах тыын суолталаах тэрилтэнэн буолар. Улахан уопуттаах кэлэктииптээх буолан, ПТВС хочуолунайдарын үлэтигэр эрэллээх.

Мииринэйдэр ып-ыраас ууну испиттэрэ биэс сыл буолла. «Ыраас уу» бырагыраама Мииринэйгэ киирбитэ биэс сыл буолла. Бу бырагырааманы олоххо киллэриигэ АЛРОСА, бырабыыталыстыба утумнаахтык, ирэ-хоро дьарыктаммыттара.

«Якутнипроалмаз» институт ыкса ылсыhан, «Ыраас уу» бырагыраама тула туох баар ирдэнэр тутуу докумуонун бэлэмнээбитэ. Иирэлээх үрэх аттыгар ууну ыраастыыр ыстаансыйа тутуллубута. Ону Саха сирин бырабыыталыстыбата уонна АЛРОСА уйуммуттара.

Элбэх эрийсии кэнниттэн, 2013 сыл түмүгэр, ууну сиидэлиир, хас да хос ыраастыыр ыстаансыйа баар буолбута. Мииринэй куорат суукка устатыгар 25 тыhыынча кууб ууну тутта олорор. Уу дьүһүнүн (цветность) таhыма диэн сыанабыл баар. Холобур, 2013 сылга диэри, уу туругун таhыма ортотунан «50» аналлаах кэрдиискэ баара. 2014 сылтан ыла ууну ыраастыыр ыстаансыйа тутуллан, «150» диэн аналлаах кэрдиискэ тиийдэ. Урут Иирэлээх үрэхтэн киирэр уу болоорхой буолар этэ. Билигин резервуардарга уу ып-ыраас, дьэҥкир.

Онон мииринэйдэр иhэр ууларын хааччыстыбата тупсан улаханнык абыраннылар.

Билигин Мииринэй уутун хаачыстыбатын кытары водозабордара сол да тутулла илик Дьокуускай, эбиитин Нерюнгри, Ленскэй куораттары кытары холуу да барбаккын. Мииринэй киэнэ быдан ордук.

Билигин иhэр ууну ыраастыырга «ОДМ2 Ф» диэн биэс сылга биирдэ уларытыллар реагент туттуллар буолла. Ууну сиидэлиир, хос ыраастыыр ситим баар буолбута. Маны сэргэ, биологическай ыраастааhын учаастагар утумнаах үлэ барбыта, бара да турар.

mir2

ПТВСка үлэ суох

Yлэ хайдах да охсуулаахтык барбытын иhин, хамнас боппуруоhа үгүhү быhаарар. Хамнас син биир АЛРОСА самалык тэрилтэтин («Дочернее предприятие») хамнаhын сиэринэн.

Бириэмийэтэ, 13-с хамнастара уонна социальнай бакыата Кэлэктиибинэй дуогабарынан бигэргэтиллэр.            

Кэнники сылларга, силиэсэр, элэктэриичэстибэ уонна гаас ньыматынан иhэрдээччи (газоэлектросварщик, тимири холбооттооччу (монтажник), хонтуруоллуур-кээмэйдиир тэрил уонна автоматика утумун (КИПиА) силиэсэрэ, хочуолунай тэрилин кэтээччи (оператор) хамнастара балачча улаатан турар.

Хамнас ортотунан 80-90 тыhыынча солкуобай. Мииринэйдэр ПТВСтара 1,7 кээписиэннэрин уонна оройуон датаассыйатын суотугар, хамнастара, бириэмийэлэрэ син биир ботуччу.

Оччотугар Мииринэй куораты хааччыйыы да хаачыстыбалаах, эрэбиллээх буолуо.

Станислав Алексеев, Мииринэй.

    

  

Тарҕат:

Комментарии

Инженер
+2 Инженер 28.05.2018 12:29
Мииринэйдэр уулара урут кирдээх этэ. Водоочистной тутаннар, уу ып-ыраас буолла. Смело крантан ууну ыймахтыыллар.
Ответить
Ээ
+1 Ээ 28.05.2018 18:36
:D Мирнэйгэ барыта учугэй. Ыраас уу, тyргэн Интернет, урдук хамнас! :lol:
Ответить

Защитный код Обновить