Войти

Войти

Өрөспүүбүлүкэ үрдүнэн халаан айдаана арыый да намыраан, билигин чөлүгэр түһэрии үлэтэ күүскэ ыытыллар. Санатан эттэххэ, быйылгы халааҥҥа Уус Майда, Амма, Чурапчы, Таатта, Мэҥэ Хаҥалас, Хаҥалас уонна Орто Халыма улуустара эмсэҕэлээтилэр. Бу улуус нэһилиэктэригэр өрөспүүбүлүкэ уонна Арассыыйа бырагыраамаларынан, тустаах көмө оҥоһуллара күүтүллэр. Ол эрээри биирдиилээн тэрилтэлэр, өрөспүүблүкэ олохтоохторо аһыныгас сүрэхтэринэн норуот хаһыата “Кыым” тэрийэр көмө аахсыйатыгар көхтөөхтүк кытталлар.

Норуот көмөлөһөргө бэлэм!

Климентий КОРЯКИН, Дьокуускай:

Климен

– “Кыымҥа” өрүү сурутабын. Онно көмө аадырыһын көрөн, айылҕа иэдээнигэр түбэспит дьоҥҥо кыратык да көмөлөспүт киһи диэн санааттан бу аахсыйаҕа кыттыһабын. Урут салайар аппараакка үлэлиир кэммэр Аммаҕа элбэхтик сылдьыбытым, онно оҕо, эдэр сааһым доҕотторо олороллор. Амма бурдуктаах буолактарын көрөн, киһи үөрэр. Саха Украината буоллаҕа. Өрөспүүбүлүкэ дьоно бүттүүн түмсэн, биир дойдулаахтарбыт кыһалҕаларын аччатыаҕыҥ.

Анна ГОГОЛЕВА, Дьокуускай:

Анна Гоголева

– Мэҥэ Хаҥаластан төрүттээхпин. Идэбинэн фармацевпын, билигин даҕаны үлэлиибин. Аһымал аахсыйаларыгар өрүү кыттабын. “Киһи тыыннааҕын, этэҥҥэтин тухары дьоҥҥо көмөлөһүөхтээх, ыарахаҥҥа түбэспиккэ илиитин уунуохтаах” диэн өйдөбүллээхпин. Онон даҕаны “Кыым” хаһыат ыҥырыытыттан туора турбатым. Сааспыт, сайыммыт тымныы буолла. Дьон сыыстарар, ыалдьар. Бэйэм эмп үлэһитэ да буоламмын, эминэн-томунан уонна сылаас таҥаһынан көмөбүн Уус Майда Эдьээнин олохтоохторугар ыытабын. Тулуһуҥ, тулуйуҥ, этэҥҥэ буолуҥ!

Марат Николаев, спортсмен:

Марат

– Биһиги тоҥмуту ириэрэр, иэдээҥҥэ түбэспити абырыыр аһыныгас сүрэхтээх саха дьоно буолабыт. Бука бары уу халааныгар түбэспит биир дойдулаахтарбытыгар күүс-көмө буолуоҕуҥ! Тус бэйэм “Кыым” норуот хаһыатын аһымал аахсыйатыгар кытынным. Эмсэҕэлээбиттэргэ бэйэм ааппыттан, кыра да буоллар, көмөбүн оҥордум. Күн киһитэ көмүскэс, айыы киһитэ аһыныгас! Бары, доруобай буолуҥ, санааҕытын түһэримэҥ!

Света Бугаева, ырыаһыт:

Света Бугаева

– Мин кыра эрдэхпинэ, нэһилиэкпитигэр улахан халаан буолбута. Ол иһин бу иэдээни эппинэн-хааммынан билбит киһи буолабын. Онон биир дойдулаахтарбар көмөлөһөргө сананным. Эһиэхэ таҥаһынан-сабынан, иһитинэн-хомуоһунан сэмэйдик көмөлөстүм. Чахчы да, “норуот күүһэ – көмүөл күүһэ” буоллаҕа дии. Бу “Кыым” аахсыйатын туһунан доҕотторбор, билэр дьоммор кэпсээбиппэр сүрдээҕин сэҥээрдилэр. Онон аһыныгас сүрэхтээх, көмөлөһөр баҕалаах дьон элбэҕиттэн үөрүөх тустаахпыт.

Александр Винокуров, эдэр учуонай:

Александр Винокуров

– Мин Гуманитарнай чинчийии институтун эдэр учуонайдарын сэбиэттэрин ааттарыттан кэллим. Уу халаана диэн айылҕа иэдээнэ буоллаҕа дии. Онон ууга барбыт өрөспүүбүлүкэ олохтоохторугар көмө оҥоһуллара саамай наадалаах. Бу санааттан “Кыым” аһымал аахсыйатыттан туора турбатым уонна барыгытын аахсыйаҕа кыттаргытыгар ыҥырабын!

Евдокия Павлова, “Аврора” мэдиссиинэ килииньикэтигэр киинигэр дириэктэри эмтиир үлэҕэ солбуйааччы:

Аврора

– “Аврора” мэдиссиинэ кэлэктиибин аатыттан Таатта улууһун Чымнаайытын олохтоохторугар 35 тыһ. уу харчынан, сэмэй бородууктанан уонна Чымнаайы 10 олохтооҕор килииньикэ күнүскү стационарыгар доруобуйаларын буор босхо бөҕөргөтөллөрүгэр өҥөнү оҥорорго бэлэммитин биллэрэбит. Бу көмөнү нэһилиэк баһылыга Егор Васильевка тиэрдэбит.

Валерий Попов, Дьокуускайтан, биэнсийэлээх:

IMG 20180530 WA0012

– Мин таҥас-сап мөһөөччүгүн аҕаллым. Үксэ оҕо таҥастара. Таҥастар туруктара үчүгэй, 95 %-на саҥа. Тус санаабар, алдьархайга түбэспиттэргэ хас биирдии киһи төһө кыалларынан көмө-тирэх буолуохтаах.

Мария Белых, 83 саастаах, Дьокуускайтан:

— Мин бэйэм Чурапчыттан төрүттээхпин, Мэҥэҕэ иитиллибитим. Тыыл бэтэрээнэбин. Мин биллэ-көстө сатаан эҥин буолбакка, ис сүрэхпиттэн бу алдьархайга түбэспит биир дойдулаахтарбын өйөөрү бу аахсыйаҕа кыттабын. Онон хаартыскаҕа эҥин түһэримэҥ. Таҥас-сап хомуйан аҕаллым.


Аграрнай баартый туора турбат!

Аграргная партия

Ол курдук, “Арассыыйа аграрнай баартыйата” Бүтүн Арассыыйатааҕы бэлитиичэскэй баартыйа Саха сиринээҕи салаатыттан:

  1. Уус Майда улууһун өйөөтүлэр
  2. Куурусса этэ – 220 хоппо, барыта – 2000 кг. – “Дьокуускайдааҕы көтөр баабырыката” ААУо, ген.дириэктэр Наталия Ивановна Дягилева.
  3. 50 кг ү/с бурдук – 20 куул – 1000 кг. – “Дьокуускайдааҕы килиэп кэмбинээтэ” АУо, ген.дириэктэр Светлана Тарасовна Кынакытова.
  4. 1 л бытыылкалаах ыраас уу – 500 бытыылка – 500 кг. – “Якутия” ҮӨПК, ген.дириэктэр Павел Юрьевич Степанов.
  5. 1,5 лиитирэлээх “Якутский” кыбаас – 333 бытыылка – 500 кг. – “Якутия” ҮӨПК, ген.дириэктэр Павел Юрьевич Степанов.
  6. 50 кг 10 куул сүөһү сиир тууһа – 500 кг. – “Туймаада” ҮӨПК АУо, ген.дириэктэр Александр Гаврильевич Васильев.
  7. 25 кг ТМИН сүөһү уотурбата – 500 кг. – “ТИМИН” ИП Т.А. Нелакиров, ген.дириэктэр Тимур Анатольевич Нелакиров.
  8. 25 кг сүөһү уотурбата – 1000 кг. – “Сайсары” БЫ ААУо, ген.дириэктэр Егор Иннокентьевич Макаров.

Барыта – 6000 кг.

  1. Амма улууһун өйөөтүлэр
  2. Барыта 1 туонна ыйааһыннаах бородуукта – “Сахаагропродукт” РСХПССК, ген.дириэктэр Константин Егорович Тимофеев.
  3. Көтөр этэ – 1000 кг. – “Дьокуускайдааҕы көтөр баабырыката” ААУо, ген.дириэктэр Наталия Ивановна Дягилева.

III. Итини таһынан үтүө баҕанан анал счекка үбү-аһы хомуйуу саҕаланна.

  1. СӨ Бырабыыталыстыбатын Бэрэссэдээтэлэ Е.А. Чекиҥҥэ уонна СӨ Үөрэҕин миниистирэ В.А. Егоровка сурук киллэрэн биэрдибит. Сурукпутугар хоруйун туттубут.

 

  1. АПР олохтоох салааларын салайааччыларыгар үтүө баҕа санаанан халаан уутуттан эмсэҕэлээбит нэһилиэктэргэ

Ытыктабыллаах Саха сирин олохтоохторо! “Кыым” норуот хаһыата сааскы халаантан эмсэҕэлээбит кыһалҕалаах дьоҥҥо ким туох кыахтааҕынан көмөлөһөргүтүгэр ыҥырар!

Халаан уутуттан эмсэҕэлээбит дьоҥҥо саҥа, ыраас малы-салы, аһы-үөлү, таҥаһы-сабы хомуйууга эрэдээксийэҕэ анал пуун тэрийдибит. Көмөлөһүөн баҕалаахтары үлэ кэмигэр Дьокуускай куорат, Киров аатынан уулусса 18, блок В, 709 офиска күүтэбит. Сиһилии билсэр төл: 8-967-912-01-48, 8-914-227-28-43.

Ким кимиэхэ тугунан көмөлөспүтүн барытын аһаҕастык иһитиннэрэри мэктиэлиибит.

Ыксаллаах быһыыга түмсүүлээх буолуоҕуҥ!

 

Тарҕат:

Комментарии

Защитный код Обновить