Күндү доҕотторум, ытыктыыр коллегаларым, биир санаалаахтарым!
Бу күннэргэ эһиги өйөбүлгүт уонна миэхэ итэҕэлгит тус бэйэбэр уонна мин дьиэ кэргэммэр олус улахан суолталаахтар. Ити иһин мин эһиэхэ махталым муҥура суох. Биллэн турар, миигин буруйдуу сатыыр дьыалаларын силиэстийэтэ уонна суута өр кэм устата барыаҕа, онон ити биһигиттэн барыбытыттан тулууру уонна эрэллээх буолууну эрэйэр. Кэмэ кэллэҕинэ бу дьыала ис хоһоонун, ымпыгын-чымпыгын барытын сиһилии кэпсиэм диэн эрэннэрэбин.
Бу үөскээбит быһыыга-майгыга быыбарым хампаанньатын буолуохтааҕын курдук кыайан ыыппатым биллэр. Ол гынан баран, биһиги бары күүспүтүн, санаабытын түмэммит, бар дьоммут туһугар саҕалаабыт кэскиллээх үтүө дьыалаларбыт салҕаналларыгар бигэ эрэллээхпин.
Санааҕытын түһэримэҥ! Ис сүрэхпиттэн барыгытыгар үчүгэйи баҕарабын!
Эһиги Николай Местниковкыт.
Санатар буоллахха, от ыйын 6 күнүгэр Арассыыйа тырааныспарга борокуратуурата Дьокуускай аэропорт генеральнай дириэктэрэ Николай Местниковы туппута.
Аэропорт генеральнай дириэктэрин, “Ньыгыл Арассыыйа” баартыйаттан Ил Түмэҥҥэ биир мандааттаах Гагарин уокуругуттан дьокутаакка хандьыдаат Николай Местниковы тутууну кини эргимтэтин дьоно “бэлитиичэскэй сакаас” дииллэр.
“Дьокуускай” аэропорт салайааччытын Н.Местниковы 2018 с. быыбарыгар qкытыннарымаары соруйан оҥоруу”, -- дииллэр биир санаалаахтара.
Барыллаан куоластааһын түмүгүнэн, испииһэккэ иккис нүөмэринэн Иван Данилов иһэр. Кини туһунан биһиги урут суруйан турабыт http://kyym.ru/sonunnar/don/578-gorduuma-dokutaata-ivan-danilov-khajdakh-kholuobunaj-dyalattan-kuotummutaj-ebeter-6-5-m-l-j-n-khajdakh-ba-abyt
Кинини от ыйын алтатыгар, “Ньыгыл Арассыыйа” баартыйа Ил Түмэн быыбарыгар кыттар хандьыдааттар испииһэктэрин туттарар күнүгэр, туппуттара. Местников утары сайабылыанньаны аэропорка таһаҕас суулуур урбаанньыттар И.Е. Чепина уонна А.Р. Попова суруйбуттар. Кинилэр этэллэринэн, “аэропорт генеральнай дириэктэригэр 14 мөл. солк. төлөөбүттэр”. Бэрэбиэркэлэммэтэх информация быһыытынан, сайабылыанньа өссө 2014 с. киирбит уонна дьыала билигин эрэ хамсаабыт. Өссө дьэҥдьииргэ бигэргэтээччи (понятой) быһыытынан Шакалов диэн урут Местников уураппыт киһитэ сылдьыбытын бэлиэтииллэр.
Онон, холуобунай уонна бэлитиичэскэй биричиинэттэн ураты, эбии экэнэмиичэскэй сылтах үөскээбитин көрдөрөр-иһитиннэрэр эйгэҕэ суруйаллар.
