Киирии

Киирии

Бүгүн, ол эбэтэр балаҕан ыйын 27 күнүгэр, Саха Өрөспүүбүлүкэтин Судаарыстыбаннаһын күнүгэр, киэһэ 17 чаастан, Опера уонна балет судаарыстыбаннай тыйаатырыгар Ил Дархан эбээһинэһин толорооччу Айсен Сергеевич Николаев Ил Дархан дуоһунаһын тутуоҕа.

 айсен

Ил Дархан эбээһинэһин хаһан, хайдах тутуохтааҕын туһунан балаһыанньа “СӨ Ил Дарханын быыбарын туһунан” сокуоҥҥа уонна Төрүт сокуоҥҥа суруллар. Инаугурацияҕа кэмигэр хайаан даҕаны Ил Түмэн дьокутааттара, бырабыыталыстыба чилиэннэрэ, Конституционнай, Үрдүкү уонна Арбитраж суутун судьуйалара, өрөспүүбүлүкэ борокуруора уонна ыҥырыылаах ыалдьыттар баар буолуохтаахтар.

Дуоһунаска киирии сиэрин быһыытынан, аан бастаан СӨ ХБКтын бэрэссэдээтэлэ балаҕан ыйын 9 күнүгэр буолан ааспыт быыбар түмүгүн иһитиннэриэхтээх.

Ил Дархан дуоһунаһын тутарыгар икки тылынан – сахалыы уонна нууччалыы андаҕар этэр: “СӨ Ил Дарханын эбээһинэһин үтүө суобастаахтык толоруом, РФ Төрүт сокуонун уонна федеральнай сокуоннары, СӨ Төрүт сокуонун уонна сокуоннарын тутуһуом, өрөспүүбүлүкэ национальнай-судаарыстыбаннай ыстаатыһын уонна кини элбэх омуктаах норуотун интэриэһин көмүскүөм, киһи уонна гражданин быраабын ытыктыам диэн бэйэм ааппынан-суолбунан уонна дьоһуммунан андаҕайабын”.

Андаҕар кэннэ СӨ Конституционнай суутун бэрэссэдээтэлэ саҥа тыллыллыбыт Ил Дархаҥҥа Ил Дархан анал бэлиэтин туттарар. Итини таһынан Саха Өрөспүүбүлүкэтин Ил Дарханын штандарда диэн түөрт муннуктаах, СӨ былааҕыныы өҥнөөх, ол эрээри үрүҥ күнүн оннугар гиэрбэлээх таҥас бэриллэр. Штандарт Ил Дархан үлэлиир хоһугар үлэлиирин тухары СӨ былааҕын уҥа өттүгэр туруохтаах. Оттон ол дубликата кини резиденциятыгар ыйанар.

Штандарт туттарыллыбытын кэннэ Ил Дархан саха омук былыргы үгэһин, устуоруйатын утумнааччы-удьуордааччы буоларын туоһуур, кинини Олоҥхо дойдутун Үрдүкү баһылыга гынар сиэр-туом толоруллар.

Тарҕат:

Комментарии

Защитный код Обновить