Киргизия бэрэсидьиэнэ Сооронбай Жээнбеков туһунан Интэриниэккэ аҕыйах мем (карикатурнай уруһуй) тарҕаммыт. Ол уруһуй ааптара, дизайнер – Никита Тарасенко диэн киһини Генеральнай борокуратуураҕа ыҥыраллар уонна быһаарыы сурук суруйарыгар соруйаллар.
Бу дьыл атырдьах ыйыгар Киргизия бэрэсидьиэнэ Иссык Кульга уоппускатын атаарбыт уонна Интэриниэккэ хаартыскатын таһаарбыт. Ону Никита Тарасенко ылан, уруһуйдаан күлүүлээх гына “киэргэтэн” биэрбит. Сымыйа эрэ дьиҥ эрэ, Куттал суох буолуутун кэмитиэтигэр Киргизия биир олохтоох дьахтара “бэрэсидьиэммит чиэһин көмүскүөххэ” диэн Никита Тарасенконы үҥсэн сурук ыыппыт. Онон көҕүлээччи ол дьахтар буолан тахсыбыт.
Оттон бу силиэстийэ түмүгүнэн, киһини суукка үҥсэр туох да чахчылары булбатаҕыттан уруһуйдары төннөрөллөрүгэр тиийбиттэр. Бу иннинэ бэрэсидьиэн пресс-сулууспатын үлэһитэ: “Ону баара, бу уруһуйдартан бэрэсидьиэн кыыһырбатах, хата, күлбүтэ. Төттөрүтүн, бу уолу борокуратуураҕа ыҥырбыттара куһаҕан”, - диэн биллэрбит. Төһөтүн да иһин, оннугу-манныгы мээнэ тарҕатар, кими эрэ күлүү-элэк гынар сэрэхтээх буолсу...
Хаартыска: "НТВ"
