Өрөспүүбүлүкэ бырабыыталыстыбата алтынньы 16 күнүгэр Саха сирин 2024 сылга диэри социальнай-экэнэмиичэскэй сайдыытын сылыктыыр былааны (прогноз) бигэргэттэ. Онтон көрдөххө, кэлэр алта сыл устата өрөспүүбүлүкэбитигэр бары кэриэтэ макро-экэниэмикэ көрдөрүүлэрин биллэ үрдэтэр сорук турар.
Бу иннинээҕи курдук, үс сылы хабан буолбакка, бүтүн алта сыллааҕыны учуоттаан туран, сайдар-үүнэр былаан Арассыыйа Бэрэсидьиэнэ Владимир Путин ыам ыйынааҕы Ыйааҕар олоҕурар.
Эрэгийиэн баалабай бородууксуйата 2018 сылга – 3,5%, оттон кэлэр сылга 2,5 % үрдүүрэ сылыктаммыт. Ити, бэл, Чайыҥданы сир баайын хостуурга бэлэм оҥоруу уонна “Сила Сибири” тутуу курдук баараҕай үлэлэри хабар илиҥҥи гаас бырагыраамата түмүктэнэрин, онон тутаах хапытаалга инбэстииссийэ киириитэ тохтуурун учуоттаан туран. Ол оннугар “Соҕуруу Саха сирэ” ТОРга сыһыаннаах инбэстииссийэлээх бырайыактар төһүү буолуохтаахтара этиллэр. Ону таһынан Элгээтээҕи таас чох холбоһугун кыамтатын уонна чох хостуур хампаанньалар тутаах хапытаалларыгар инбэстииссийэ кииириитэ улаатарын былаанныыллар. Ол суотугар бырамыысыланнай оҥорон таһаарыы физическэй кээмэйин индексэ 2024 сылга тиийэн – 1,4 бүк, эрэгийиэн баалабай бородууктата, дьиҥ ааҕыынан 21% үрдүөхтээх.
Аны, Саха сирин нэһилиэнньэтэ эбиллиэ диэн буолбут. Онуоха, холобур, Элгээҕэ билиҥҥитэ баахтанан үлэлээччилэр бөһүөлэктэрэ баар эбит буоллаҕына, бастайааннай төрүккэ олорооччу онно элбиирэ олук буолуохтаах. Бырамыысыланнаһы таһынан атын хайысхалар, холобур, тыа хаһаайыстыбатын салаатыгар сыһыаннаах астыыр, таҥастыыр хайысха, ойуур бырамыысыланнаһа, миэбэл оҥоруута, ювелир уонна кырыылыыр салаа, креативнай экэниэмикэ да көрдөрүүтэ, кырата, сыл аайы 10 %-тан кырата суох улаатыахтааҕа көстөр.
Социальнай эйгэ тутаах соруга да – социальнай мэктиэни толоруу, хамнаһы үрдэтии – уҕараабат. Социальнай босуобуйалары импилээссийэ таһымынан 4 % үрдэтэр былаан баар.
