Бүгүн, сэтинньи 19 күнүгэр Ил Дархан уонна бырабыыталыстыба дьаһалтатын салайааччы Федор Борисов Саха сирин дьиэ-уот хомунаалынай хаһаайыстыбатын уонна энергетикэҕэ министиэристибэтин кэлэктиибигэр саҥа анаммыт миниистири бастакы солбуйааччы Вячеслав Емельяновы билиһиннэрдэ.
“Вячеслав Павлович ДьУоХХ уонна энергетика эйгэтигэр саҥа кэлбит киһи буолбатах. Кини оҥорон таһаарыыга уонна салайыыга улахан уопуттаах. Эһиги кэлэктиипкит кинини бэркэ диэн билэр. Мин кини иннигэр туруоруммут сыалы-соругу судургутук толоруо диэн эрэнэбин”, - диэтэ Федор Борисов.
Вячеслав Емельянов министиэристибэҕэ энергетика боппуруоһун, күһүҥҥү-кыһыҥҥы кэми туорааһыны, өрөспүүбүлүкэ энергетическэй уонна ититии комплексыгар наадалаах ресурсаны тиэрдиинэн быһаччы дьарыктаныаҕа.
