Киирии

Киирии

Тохсунньу 17 күнүгэр куорат баһылыга Сардана Авксентьева “Дьокуускй куорат” куораттааҕы уокурук 2018 сыллаах үлэтин түмүгүн отчуоттаата.

Баһылык отчуотун  бүддьүөтү билиһиннэрииттэн саҕалаата. Ол курдук, ааспыт сылга куораттааҕы уокурук бүддьүөтэ 18 млрд 202 мөл 600 тыһ солк тэҥнэспит. Сардана Владимировна нолуоктан киирии дохуот динамикатын үрдүктүк сыаналаата. Оттон хоромньу – 18 млрд  481 мөл солк. Салҕыы социальнай эбийиэктэр уонна олорор дьиэлэр тутууларын иһитиннэрдэ. Ааспыт сылга 219 хаарбах туруктаах олорор дьиэлэр (2042 кыбартыыра) көһөрүллүбүттэр. 113 кыбартыыра тулаайах оҕолорго бэриллибит.

“Айыы кыһата” оскуола саҥа дьиэтэ тутуллан үлэҕэ киирбит,  норуоттар икки ардыларынааҕы арктическай оскуола уонна 25, 6 №-дээх оскуолалар дьиэлэрэ тутуллан түмүктэнэллэрэ чугаһаабыт. 75 №-дээх “Ивушка”, 23 №-дээх “Цветик-семицветик” уонна Сыырдаахха тутуллубут уһуйааннар үлэҕэ киирбиттэр. Ону таһынан, 30 №-дээх “Малышок” уонна 203-с түөлбэҕэ саҥа уһуйааннар тутуллан түмүктэнэн эрэллэрин эттэ. 35 №-дээх инклюзивнай оскуола саҥа дьиэтэ  үлэҕэ киирбит. Табаҕаҕа спорт былаһааккалаах “Кедр” култуура киинин тутуута  саҕаламмыт.

Үүммүт сылга Дьокуускайга эбии 14 сылаас тохтобул тутуллара, 23 км суол оҥоһуллара былааннанар.   Ааспыт сылга 5,3 км суол өрөмүөннэммит.

“Ситим” медиа-бөлөх генеральнай дириэктэрэ, Набережнай уокуруктан норуот дьокутаата Мария Христофорова, 15 №-дээх оскуола сыбаайатын бөҕөргөтүүгэ туох үлэ ыытылларын ыйытта. Ону таһынан, 202 уонна 203 түөлбэлэр икки ардыларыгар баар намыһах сиргэ былырыын күһүн уол оҕо эчэйэн, сиһин тоноҕоһун тоһутан күн бүгүнүгэр диэри балыыһаҕа сытарын кэпсээтэ. Инниктин маннык түбэлтэ тахсыбатын туһугар бу кыһалҕаны хайдах быһаарыахха сөбүн ыйытта. Уонна 203 түөлбэ олохтоохторун көрдөһүүлэринэн 17-с №-дээх маршрутнай оптуобус сырыытын саатар биир тохтобулунан уһатыахха сөбүн туһунан санаатын эттэ.

15-с №-дээх оскуола сыбаайатын бөҕөргөтүү оруннаах. Билиҥҥи туругунан бырайыактыыр смета докумуона ситэтэ суох. Ону ситэрэн оҥоруу  быһа холоон 2 мөл солк ирдиир. Ол иһин, докумуон толору ситэ илигинэ үлэ саҕаланар кыаҕа суох. Миэхэ тутааччылар иһитиннэрбиттэринэн бу кыһалҕа оскуола соччото суох сиргэ турарыттан буолбакка, сыллата канализация уута дьөлө сүүрбүтүн түмүгэ буолуон сөп. Оттон 202 уонна 203 түөлбэлэр икки ардыларыгар баар намыһах сир туһунан этэр буоллахха, бу сири уопсастыбаннай миэстэ оҥорор туһунан этии киирбитэ. Тутааччыларга бу этиини болҕомтоҕо ылалларыгар сорудахтыам. Уонна бу түөлбэлэр олохтоохторун кытта кэпсэтэн, кинилэр санааларын истэр тоҕоостоох. 17 №-дээх оптуобус сырыытын уһатыы кыаллар боппуруос. Бу сылга Ларионов уулуссата уонна Ленин проспегын салҕааһына өрөмүөннэниэхтээх. Онон түөлбэлэр олохтоохторо кыратык тулуйалларыгар тиийэллэр”, – диэн Сардаана Авксентьева хоруйдаата.

Тарҕат:

Комментарии

Защитный код Обновить