Киирии

Киирии

РФ Киин быыбардыыр хамыыһыйата (ЦИК) быһаарбытынан, Арассыыйа  бэрэсидьиэигэр хандьыдаат Павел Грудинин Швейцария бааннарыгар баар 13 счетугар 1 мөл. дуоллар, маны таһынан 174 унция кыһыл көмүстээҕэ билиннэ. Бу туһунан “Россия 24” ханаалга ЦИК РФ бэрэссэдээтэлин солбуйааччы Николай Булаев иһитиннэрдэ. 

 Кини этэринэн, 2017 сыл ахсынньытыгар Швейцарияҕа Грудинин 13 счеттаах уонна “онтон да атын харчыны уонна кыһыл көмүһү хаһаанар финансовай үстүрүмүөннээх” эбит.

“Швейцария иһитиннэриитигэр олоҕуран, биһиги нолуогабай сулууспабыт бигэргэппитинэн, харчы уопсай суумата 1 мөл. дуоллар. Маны таһынан 174 унция кыһыл көмүс”, - диирБулаев.

Грудинин бэрэсидьиэн хандьыдаатыгар тохсунньу 12 күнүгэр регистрацияламмыта. Сокуон барылынан, регистрация кэмигэр ЦИКкэ хандьыдаат тас дойдуларга харчы счета уонна финансовай үстүрүмүөнэ суоҕун туһунан сибидиэнньэ биэриэхтээх этэ.

Бу докумуоҥҥа Грудинин тас дойдуларга баар 5 счетун уонна сыаналаах кумааҕы туһунан иһитиннэриини суруйбут. Маны тэҥэ омук бааннарыгар харчытын хаһааммат уонна кинилэр өҥөлөрүн туһаммат буолбутун туһунан иһитиннэрэр суругу туттарбыт.

Кэлин биллибитинэн, олунньу ый саҥатыгар Грудинин Швейцарияҕа икки ситэ сабыллыбатах счеттаах уонна Австрияҕа эмиэ икки хаалбыт эбит.

Олунньу ый ортотугар Булаев биллэрбитинэн, Грудинин ЦИКкэ тас дойдуларга баар счетун толору саппытын туһунан сайабылыанньаны иккитэ туттарбыт. Ол кэмҥэ Булаев докумуоннар Нолуогабай сулууспа иһитиннэриитигэр сөп түбэспэттэрин бэлиэтии көрбүт.

“Швейцария нолуогабай уорганнара иһитиннэрэллэринэн, Грудинин эбии Швейцария бааннарыгар 11 счеттааҕа, маны таһынан биирдэстэригэр кыһыл көмүс уурулла сытара билиннэ”, – диэн кулун тутар 5 күнүгэр РФ ЦИК чилиэнэ Александр Кинев эттэ.

КПРФ хандьыдаатын төрөппүт уола Артем Грудинин Латвияҕа хамсаабат баайдааҕа уонна хас да сыл анараа өттүгэр онно олорорго көҥүл ылбытын туһунан олунньуга Life.ru портал иһитиннэрэн турардаах.

Бу туһунан ТАСС иһитиннэрэр.

Тарҕат:

Ырытыыгын суруй

Защитный код
Обновить

Бүтэһик сонуннар