Минвостокразвития Уһук Илин сайдыытын саҥа моделын олоххо киллэрэр. Ол быһыытынан, Уһук Илиҥҥэ Азия-Чуумпу Байҕал эрэгийиэнигэр бэлэм табаар (үлэ, өҥө арааһа) экспорда, кыахтаах инвестициялаах килиимэт, кыра уонна орто урбааны көҕүлүүргэ саҥа инвестициялар, ол иһигэр омук дойдуларын кытыннарыы, күрэстэһэр кыахтаах урутаан сайдыы территорияларын тэрийии ыытыллыахтаах.
Бу туһунан Арассыыйаҕа Минвостокразвития кэллиэгийэтин мунньаҕар РФ Уһук Илин сайдыытын миниистирэ Александр Галушка биллэрдэ. Миниистир этэринэн, бу модель хайыы үйэ Арассыыйа Бырабыыталыстыбатын Уһук Илиҥҥэ анаммыт 30 саҥа сокуонугар уонна 150 аактатыгар туолбут. “Балар истэригэр урутаан сайдыы территориятын, Владивосток көҥүл пуордун, “Уһук Илин гектарын”, энерготариф түһүүтүн, омук туристарыгар электроннай виза курдук уустук уонна саҥалыы көрүүлээх сокуоннар киирэллэр. Бу сокуоннар үлэлээн саҕалаатылар. Биһиги маны барытын дьон туһугар толкуйдаан оҥорбуппут”, – диэн Минвостокразвития салайааччыта быһаарда.
Санаттахха, кулун тутар 6 күнүгэр Владивостокка, Уһук Илин федеральнай университетыгар Уһук Илин сайдыытын министиэристибэтэ түмүктүүр мунньаҕар бүтэһик 4,5 сылга Уһук-Илин сайдыытыгар туох-ханнык үлэ ыытыллыбытын кэпсэтиэхтэрэ.
Маны таһынан кэллиэгийэҕэ 2018 с. уонна кэлэр 6 сыллааҕы сыал-сорук быһаарылынна. Миниистир эппитинэн, федеральнай уонна эрэгийиэн былаастарын иннигэр турбут соруктар “Арассыыйа илиҥҥи территориятын тэтимнээх сайдыытын хааччыйыахтаахтар”.
Кэллиэгийэҕэ кытта вице премьер – Уһук Илиҥҥэ Бэрэсидьиэн полпреда Юрий Трутнев, институттар салайааччылара: Инвестиция уонна экспорт агентствота, Уһук Илин сайдыытын корпорацията, Уһук Илиҥҥэ Киһи хапытаалын сайдыытын агентствота – кэллилэр. Уһук Илин эрэгийиэнин күбүрүнээтэрдэрэ, Минвостокразвития уонна биэдимэстибэҕэ Уопсастыбаннай сэбиэт чилиэннэрэ, федеральнай уонна эрэгийиэн былааһын бэрэстэбиитэллэрэ, уопсастыбаннас кэллиэгийэҕэ кыттыахтара.
СӨ Ил Дархана Егор Борисов Владивостокка кулун тутар 6 күнүгэр буолар Арассыыйаҕа Минвостокразвития биэдэмистибэ 2017 сыллааҕы үлэтин-хамнаһын ырытар уонна инники соруктары торумнуур мунньаҕар кыттыаҕа.
