Балаҕан ыйын 14 күнүгэр Ил Дархан Айсен Николаев “Россия” ханаал генеральнай дириэктэрин сүбэһитин, биллииллээх спортивнай суруналыыһы Дмитрий Губерниевы кытта көрүстэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Кинилэр экология, чуолаан ойууру харыстааһын боппуруостарын дьүүллэстилэр. Дмитрий Губерниев Дьокуускайга “Сохраним лес” экологическай аахсыйаҕа кытта кэлэ сырытта. Манна уопсастыбанньыктар, экологтар Бүлүүлүүр суол 44 км 2 тыһ тахса бэс маһы олортулар.
Ил Дархан Дмитрий Губерниевка махталын тиэртэ. Дмитрий Саха сиригэр сырыытын, аахсыйа туһунан санаатын үллэһиннэ.
“Аахсыйа бэркэ ааста, мас бөҕөтүн олортубут. Биир мэс маһы илдьэ барыам уонна даачабар олордуом. Саха сиригэр сырыым миэхэ улахан чиэс буолар. Дьон-сэргэ олус сэмэйдэр, элэккэйдэр. Аахсыйаҕа кыттыбыт ыччаттан олус астынным. Кинилэри кытта кэпсэтиибэр төрөөбүт дойдуну сайыннарыы улахан суолталааҕын тоһоҕолоотум”, – диэн Губерниев эттэ.
Санатар буоллахха, “Сохраним лес” аахсыйа “Живи лес” диэн бүтүн Арассыыйатааҕы аахсыйа иһинэн ыытыллар. Марафон дойду үрдүнэн алтынньы 31 күнүгэр диэри ыытыллар. 2011 сылтан маннык аахсыйаларга 20 тахса мөл киһи кыттыбыт, 400 тахса мөл мас олордуллубут.
