Балаҕан-алтынньы ыйдарыгар “Рейтинг” информационнай коммуникация Киинэ ыытар губернатордар национальнай эриэйтиннэрин түмүгэ таҕыста. Бу эрийэтини анал эспиэрдэр эрэгийиэн салайааччыларын үлэлэрин сыаналаан, анаалыстаан баран таһаараллар.
Биһиги Ил Дархаммыт Айсен Николав бу эриэйтиҥҥэ 16-с миэстэҕэ таҕыста, оттон Уһук Илин баһылыктарын ортотугар— бастакы миэстэҕэ сылдьар. Бу иннинэ, от–атырдьах ыйдарыгар Айсен Сергеевич Арассыыйаҕа 17-с миэстэҕэ сылдьыбыта.
Эспиэрдэр Айсен Сергеевич эриэйтиҥҥэ эрэллээхтик бэйэтин балаһыанньатын тутарын бэлиэтииллэр. Онуоха Ил Дархан билиҥҥи уонна өр кэмнээх үлэни ыытар сатабылынан быһаараллар.
Бастатан туран, Айсен Николаев балаҕан ыйыгар буолбут ВЭФ чэрчитинэн ыытыллыбыт РФ Судаарыстыбаннай Сэбиэтигэр Уһук Илин сайдыытын тосхолун ырытыыга олус бэрткэ кыттыбытынан сыаналыыллар. Инньэ гынан, кини Уһук Илин губернатордарын ортотугар бастыҥнарынан ааттаныан ааттаммыт. Маны таһынан, балаҕан ыйын 24-28 күннэригэр Дьокуускайга ыытыллыбыт биэс күннээх Арктика сайдыытыгар туһуламмыт Хотугу форумҥа бэрт хорутуулаахтык үлэлээбитин сыаналаабыттар.Айсен Николаев бу аан дойду эспиэрдэрэ кыттыылаах улахан тэрээһини тэрийиигэ уонна форум үлэтигэр быһаччы кыттыбытын үчүгэйдик сыаналаабыттар. Эспиэрдэр форум кэмигэр Дмитрий Медведев Айсен Николаевы РФ Бырабыыталыстыбатын иһинэн Муора кэллиэгийэтин састаабыгар киллэрбитин болҕомтоҕо ылбыттар.
Маны таһынан, эспиэрдэр Ил Дархан өрөспүүбүлүкэҕэ массыына уонна тимир суолларын инфраструктуратын тутууга ыытар үлэтин сыаналаабыттар. Хотугу форум кэмигэр Ленскэйдээҕи ньиэп-гаас баайдаах сири арыйыытын болҕомтоҕо ылбыттар. Бу ньиэп-гаас баайдаах сир Саха сирэ дойдуга ньиэп-гаас хостооһунугар инники күөҥҥэ киирэрин түстүүллэр. Маны таһынан, энергетика комплексыгар баараҕай үлэлэри: аччыгый уйуктаах АЭС тутуутун уонна гаас собуотун тутууга сөбүлэҥи түһэрсибитин учуоттаабыттар. Эспиэрдэр Айсен Николаев медиа эйгэҕэ тахсыыта күүһүрүүтүн дириҥ ис хоһооннооҕун уонна бэркэ ыытылларын сыаналаабыттар. Ил Дарханы норуот өйүүрэ улаханын өссө төгүл бэлиэтээбиттэр. Ити — эриэйтини оҥорууга биир баһылыыр суолталамытын тоһоҕолообуттар.
