Ил Түмэн дьокутааттара XI (уочараттаах) пленарнай мунньахха, “Ил Түмэн” бэчээт кыһата" автономнай тэрилтэ генеральнай дириэктэрин дуоһунаһыгар Мария Николаевна Христофорованы аныыр туһунан боппуруоһу көрдүлэр.
Мария Николаевна “Ил Түмэн” хаһыат сайдыытын сүрүн тосхоллорун бэлиэтээтэ, “Ситим” медиа-бөлөх үлэтин сырдатта.
“Парламент хаһыата Ил Түмэн үлэтин үчүгэйдик сырдатар. Биһиги 20 сыл устата ыытыллыбыт үлэни салҕыахпыт, күүһүрдүөхпүт уонна саҥа сүүрээннэри киллэриэхпит. Холобур, ыччаты сокуон былаанынан иитэр булгуччулаах дии саныыбын. Дьон бэйэлэрин эрэ бырааптарын буолбакка, эбээһинэстэрин эмиэ билиэхтээхтэр. Ол иһин, бу хайысханан ыытыллар үлэ күүһүрүөхтээх. Тус бэйэм “Ваше право” хаһыаты таһаарар үөрүйэхтээхпин. Ону таһынан, ыччат парламенын кытта үлэ салҕаныаҕа. Тоҕо диэтэххэ, кинилэр ортолоруттан политиктар тахсыахтара. Уонна дьокутааттар көмөлөһөөччүлэрин үлэтин сырдатар былааннаахпын. Хаһыат экономическай туругун тупсарыыга бигэ үлэ ыытылларыгар сүрүн болҕомто ууруллар тустаах”, – диэн Мария Христофорова былаанын иһитиннэрдэ.
Өрөспүүбүлүкэ норуодунай дьокутаата Игорь Григорьев маннык эттэ: “Мария Николаевна Арассыыйа Хотугу-Илиҥҥи уокуругар биир саамай бөдөҥ “Ситим” медиа-бөлөх бастыҥ салайааччыта буоларын дакаастаата. “Ситим” медиа-бөлөх үлэлиирин тухары эрэгийиэн уонна Арассыыйа таһымыгар улахан ситиһиилэрдээх. “Ил Түмэн” хаһыат Мария Николаевна салайыытынан бэлиитикэ сонуннарын сырдатар биир сүрүн хаһыат буолуо. Ахсаана хас да бүк улаатыа, олохтоохтор үөрүүнү кытта ааҕар хаһыаттара буолуо диэммин эрэнэбин”.
Александр Жирков, Юрий Николаев, Софрон Афанасьев, Петр Аммосов хаһыат ахсаанын улаатыннарыыга, тахсар матырыйааллар хаачыстыбаларыгар, сайыннарыыга туох саҥа көрүүлээҕин туһунан туоһуластылар.
Мария Христофорова (“Гражданская платформа”) Набережнайдааҕы биир мандааттаах быыбардыыр уокуруктан норуодунай дьокутаатынан талыллыбыта. Билигин Ил Түмэҥҥэ “Биир ньыгыл Арассыыйа” бүтүн Арассыыйатааҕы политическай партия фракциятын чилиэнэ буолар.
Михаил Гуляев 2005 сыллаахха тэриллибит “Спорт Якутии” хаһыат устуоруйатын сырдатта. “Медиа-бөлөх дириэктэрин уонна хаһыат эрэдээктэрэ Александр Посельскай сатабыллаах салайыыларынан, хаһыат түөрт төгүл: 2011, 2012, 2013, 2015 сылларга Арассыыйатааҕы бириэмийэ “Самая тиражная региональная газета о спорте” диэн номинациятын ылбыта. Ахсаана 10 тыһ экз.тиийбитэ. Мария Николаевна ол саҕана ыыппыт үлэтин сыаналыыбын. Парламент хаһыата элбэх ахсааннаах, интэриэһинэй буоларыгар баҕарабын”, – диэн эттэ.
Дьүүллэһии түмүгүнэн “Ил Түмэн” бэчээт кыһатын” салайааччы дуоһунаһыгар Мария Христофорова кандидатуратын биир санаанан өйөөтүлэр.
“Ил Түмэн” хаһыаты 2017 сыл алтынньы ыйтан Наталья Попова салайбыта.
Ыспараапка:
Христофорова Мария Николаевна Дьокуускай куоракка төрөөбүтэ.
1989 сыллаахха Дьокуускайдааҕы тыа хаһаайыстыбатын институтун бүтэрбитэ.
1988 сылтан лабараанынан онтон научнай үлэһитинэн үлэлээн саҕалаабыта.
1998-2003 сылларга СӨ тыа хаһаайыстыбатын министиэристибэтин “Агроинформ” тэрилтэ, “Информационнай-консультационнай сулууспа” дириэктэринэн үлэлээбитэ.
2003-2009 сылларга сүбэһитинэн, “АЛРОСА” Инвестиционнай бөлөҕүн пресс-сэкирэтээринэн үлэлээбитэ.
2004 сылтан “Ситим” медиа-бөлөх генеральнай дириэктэрэ.
Мария Христофорова РФ сибээс уонна маассабай коммуникация министиэристибэтин бочуоттаах кыраамататынан, быыһыыр үлэни тарҕатыыгар РФ ЫБММ мэтээлинэн, РФ Уопсастыбаннай палаататын, СӨ Ил Дарханын, Бырабыыталыстыбатын махтал суруктарынан наҕараадаламмыта.
Мария Николаевна СӨ тыатын хаһаайыстыбатын, СӨ култууратын, СӨ экономика министиэристибэтин туйгуна, “Экономическая опора РФ” бириэмийэ лауреата, СӨ урбаан уонна туризм сайдыытын министиэристибэтин “Лидер перемен” бириэмийэ лауреата.
