Филиппиныга Арассыыйа посола Игорь Ховаев Айсен Сергеевичка “Якутия” АХ анал эриэйсинэн Арассыыйа туристарын эвакуациалааһыны тэрийиитин иһин махталын биллэрбит. Бу туһунан Ил Дархан уонна бырабыыталыстыба пресс-сулууспата иһитиннэрэр.
Посол суругар Ил Дархаҥҥа кулун тутар 31 күнүгэр “Якутия” АХ сөмөлүөтүнэн 171 биир дойдулаахтарбытын Манила уонна Калибо аэропортарыттан Владивостокка дылы аҕалбыттарыгар истиҥ махталын биллэрэр. Ховаев “маннык гуманитарнай миссия Филиппинытааҕы партнердарбытын долгутта, ол иһигэр Филиппины тас дойдулар дьыалаларыгар миниистирин Теодор Локсины”, - диир. Кини “Якутия” авиахампаанньа экипаһыгар эвакуацияны хорсуннук оҥорууларын иһин тоһоҕолоон махтаммыт.
