Свердловскай уобалаһын дьокутааттара киин куорат мээрин аһаҕас быыбарынан талыыны тохтоттулар. Ол эбэтэр, мантан ыла, дьокутааттар көмөлөрүнэн, Екатеринбург куорат олохтоохторо мээрдэрин быыбардаабат буолуохтара. Кинини куорат дууматын дьокутааттара бэйэлэрин истэриттэн быыбардыахтара.
Уобалас парламеныгар бу этиини 42 дьокутаат өйөөтө, 4 киһи утарда. Екатеринбург билиҥҥи мээрэ Евгений Ройзман “харчыны экэниэмийэлиибит диэн матыыптаан аһаҕас быыбары тохтотор сыыһа. Ол 5 сылга биирдэ буолар быыбарга 150 мөл. солк. ороскуоттанар буоллаҕына, уобалас баһылыгын пиарыгар сылын аайы 500-түү мөл. матайданар. Мээр аһаҕас быыбара – олохтоохтор куорат бэлиитикэтигэр орооһор собус-соҕотох ырычаахтара. Дьону онтон матарар сыыһа” дии сатаата да, ону ким да ылыммата.
Сведловскай уобалас баһылыга Е.Куйвашев уонна уобалас киин куоратын мээрэ Е.Ройзман батыспакка “сэриилэспиттэрэ” хаһыс да сыла буолбутун билэбит. Быһата, уобалас дьокутааттара баһылыктарыгар Куйвашевка бэрт буолаары, Ройзманы тохтотор саамай судургу ньыманы булбуттар диэххэ наада.
