Киирии

Киирии

«Кыым.ру» саайка “Ил Түмэн спикеринэн кими көрөҕүн?” диэн интэриниэт-куоластааһын буолан ааста. Дьон дьүүлүгэр икки киһи турбута: Ил Түмэн спикерэ Александр Жирков уонна Саха сирин Москубаҕа бастайааннай бэрэстэбиитэлэ Юрий Куприянов.

Бастатан туран, маннык куоластааһын тоҕо тэрилиннэ диир буоллахха, аны күһүн Ил Түмэн быыбара буоларынан сибээстээн, ханнык баҕарар хаһыат маннык суолталаах тэрээһиҥҥэ дьон болҕомтотун тардар быһаччы эбээһинэстээх. Онуоха Юрий Куприянов “Ил Түмэн бэрэссэдээтэлин дуоһунаһа нэһилиэстибэнэн бэриллибэт” диэн туран, спикер дуоһунаһыгар бэйэтинэн дураһыйарын туһунан эппитэ төһүү буолла: “Дьэ эрэ, дьон-сэргэ ону туох диир эбитий?” — диэн санааттан.

Дьон-сэргэ үксүн, этэргэ дылы, “сүрэҕинэн куоластыыра” баар. Холобур, “көстөр дьүһүнүнэн” ордук дьахтар аймах куоластыыр идэлээх. Бу да сырыыга оннук этиилэр бааллар.

Манна биири бэлиэтиир сөп. Үгүс дьон Александр Жирков үлэтин киһиэхэ өйдөнүмтүө өттүнэн эрэ сыаналыыр. Холобур, Күлүмнүүр аатын тилиннэрии, Кыргыстааҥҥа Максим Аммосов аатын үйэтитии, “Манас” олоҥхону тылбаастааһын уо.д.а. курдук “култуурунай” хайысхалаах үлэнэн.

Ол эрэн, Ил Түмэн кэнники сылларга федеральнай таһымҥа лаппа “ыйааһыннаммытын” үгүс дьон болҕойбот. Тоҕо диэтэххэ, сокуону оҥоруу үлэтэ дьон олоҕор-дьаһаҕар тутатына дьайбат, дьайарын саҕана ону бары буолуохтааҕын курдук ылыналлар. Холобур, “Уһук Илин гектарын” туһунан сокуоҥҥа уларытыылары киллэриигэ, ирбэт тоҥу харыстааһын туһунан өрөспүүбүлүкэ сокуонун өрөспүүбүлүкэҕэ ылыныы, онтон федеральнай таһымҥа көҕүлээһин, Уһук Хотугу эрэгийиэн оҥорон таһаарааччыларыгар электроэнергия тарыыптарын Арассыыйа орто көрдөрүүлэригэр тэҥнээһин уо.д.а. курдук кэскиллээх үлэни киһи барыта кэтээн көрбөт.

Куоластааһын муус устар 4 күнүгэр күнүс 12.00 чааска түмүктэммитэ. Барыта 19 087 киһи куоластаабыт буоллаҕына, 9 987 (52,32 %) киһи Александр Жирковка биэрбит. Юрий Куприянов 8 525 (44,66 %) куоластаах. “Хайаларын да талбаппын” — 575 (3,01 %).

Юрий Куприянов үлэтин ким да эридьиэстээбэтэх диэххэ сөп. Арай “мэлдьи толорооччу быһыытынан сылдьыбыта” диэбиттэр. Дьиҥэ, кини даҕаны хомсомуолтан, профсойуустан саҕалаан, миниистиргэ, премьер бастакы солбуйааччытыгар тиийэ араас “публичнай” үлэҕэ сылдьымахтаабыт киһи буоллаҕа.  

Куоластааһын иэрэ-баара курдук буоллаҕына, кэмэнтээрийдээччи дьон Александр Жирковы аҥаардастыы хайҕаабыттар. Ордук саха аатын үрдүктүк тутарын, саха патриота буоларын бэлиэтииллэр эбит. Утарааччылар “наһаа уһуннук олордо” диэнинэн муҥурдаммыттар. Ол эрэн, этиллибитин курдук, парламентарий быһыытынан үлэтин эридьиэстээччи суоҕун тэҥэ. Арай, “Мин Сахам сирэ XXI үйэҕэ” Үтүө дьыалалар хамсааһыннарын турууласпытын ахтан аһарбыттар.

Онон, бу куоластааһын, сорох дьон этэрин курдук, саханы хайытыы буолбатах, төттөрүтүн, Ил Түмэн быыбарыгар дьону түмэ тардар сыаллаах-соруктаах тэрилиннэ.

Тарҕат:

Ырытыыгын суруй

Защитный код
Обновить

Бүтэһик сонуннар