Дьокуускай куорат баһылыгын бастакы солбуйааччыта Евгений Григорьев быстах кэмҥэ баһылык эбээһинэһин толорооччунан ананна. Маннык быһаарыыны бүгүн куорат думатын дьокутааттара сессия кэмигэр бигэргэттилэр.
«Бастатан туран Сардаана Владимировнаҕа доруобуйаны баҕарабын. Билигин кини балыыһаҕа сытар,сотору кэминэн эпэрээссийэлэниэхтээх. Миэхэ куораты салайыыга эрэммиттэригэр махтанабын. Сүрүн сорукпут диэн куорат олоҕун-дьаһаҕын, хаһаайыстыбатын, социальнай эйгэтин, тырааныспарын систиэмэтин хаачыстыбалаахтык үлэлэтии», – диэн сессия кэмигэр саҥа мээр эттэ.
Евгений Григорьев 2021 сылга Сардаана Авксентьева былааннарын салгыы олоххо киллэрэрэ санаалааҕын эттэ. Куорат дьаһалтатын хамаандата, отделлар салайааччылара, бары үлэһиттэрэ онуларыгар хаалаллар, улахан уларыйыы тахсыбат.
