Войти

Войти

Киин куораппыт саҥа баһылыктанна. Үс күннээх быыбар кэнниттэн туох түмүктэргэ кэлэбит? Ити туһунан дьон санаатын ааҕыҥ.

Егор Жирков, Ил Түмэн урукку дьокутаата:

-- Сыыппараларга тохтоотоххо: куорат баһылыгын быыбарыгар быыбардааччы 41% эрэ, ол эбэтэр баара-суоҕа 84 тыһ. киһи кытынна. Ити олус намыһах көрдөрүү. Григорьев быыбардааччы уопсай ахсааныттан 18,5% ылла, оттон Обедин – 16,5%. 120 тыһ. быыбардааччы отой да кыттыбата, бу – куһаҕан көрдөрүү. Мантан ханнык түмүккэ кэлэбит? Бастакынан: Биллэн турар, былаас баартыйата кыайыыны ситистэ. Айсен Николаев туруорбут киһитэ кыайыылаах таҕыста. Мантан “ханнык сыананнан кыайыы ситиһилиннэ?” диэн ыйытыы күөдьүйэн тахсар. Быыбарга кыайыан сөптөөх Владимир Федоровы кирдээх технологияны туһанан туораттылар. Бүлүтүөҥҥэ Федоров аата баара буоллар, быыбардааччы кинини талыа этэ. Онон Федоров мээр буолар миссиятын уордулар. Иккиһинэн: Быыбардааччы 40%-ча бырыһыана Обедиҥҥа биэрбитэ – сонун көстүү. Кини ылбыт куолаһыттан аҥара бырачыаһы биллэрии да буолуон сөп. Маныаха “Сиэрдээх Арассыыйа” сүүйүүлээх таҕыста. Обедин биллэр суруналыыс буолара элбэҕи тэптэ. Аналитическэй толкуйа уонна тутулуга суоҕа киниэхэ элбэҕи эптэ. Бүгүн Обедин дьон ортотугар дьиҥнээх аптарытыаттаах бэлиитик буолара тахсан кэллэ. Үсүһүнэн. Былаас баартыйата бу күһүн буолаары турар Госдума быыбарыгар бэлэмэ суоҕа көһүннэ. Кирдээх технологияны туһанан хандьыдааты суулларалларын быыбардааччылар балаҕан ыйын 19 күнүгэр санатыахтара турдаҕа. Бырачыастыыр куоластар “Сиэрдээх Арассыыйа” туһугар барыахтара диэн сылыктыыбын.

Онтон түмүгү оҥостуохтара дуо? Саарбахтыыбын. Е.А. Борисов саҕаттан Путиҥҥа саамай кыра куолаһы бэрдэрэрэр былаастар хас сырыы ахсын дьиҥ көстүүттэн түмүгү кыайан оҥорботтор. Ол оннугар кинилэр араас маневрдары, албастары, манипуляциялары уонна бэлиитикэ технологияларын туһанары эрэ толкуйдууллар. Быыбардааччы 60% тоҕо тахсыбатаҕын туһунан былаастар толкуйдууллар дуо? Дьиҥэ кинилэргэ эмиэ былаас буоллахтара дии. Бу дьон – былаастан кэлэйбит, итэҕэллэрин сүтэрбит дьон. Кинилэртэн саатар уон гыммыт биирэ уурунаҕа кэлбитэ буоллар, былаас баартыйата сууллуох этэ. Оттон ити өрөспүүбүлүкэ салалтатыгар улахан охсуулаах буолара өйдөнөр. Сайыҥҥы-күһүҥҥү быыбар хампаанньатыгар Тумууһап-Юрий Григорьев баартыйаларыгар аны Обедин кыттыһан саҥа тренд киллэриэхтэрэ. Сиэрдээхтэр бу быыбардартан түмүк оҥостон, быыбардааччы ахсаанын хайдах тардарга толкуйдуохтара. Биһиэхэ үгэс курдук 4 баартыйа аны күһүҥҥү быыбарга киирсиэхтэрэ, саҥа бэһис баартыйа кэлиитин улаханнык саарбахтыыбын. Мин, гражданин быһыытынан, бэйэбэр соһуччу түмүктэри оҥордум. Путин сууллубат, үйэлээх бэрэсидьиэн, маны таһынан баартыйа үйэлээх салайааччылара Зюганов, Жириновскай уонна Миронов эбит буоллахтарына, аны күһүн Саха сирин быыбардааччылара Тумууһабы ордук өйүөхтэрэ. Тоҕо? Биир өттүнэн, “Сиэрдээхтэр” Тумууһабы өйүөхтэрэ. Иккис өттүнэн, “Биир ньыгыл” уонна былаастар бэйэлэрин истигэн киһилэрин туруоруохтара, билигин кинилэр куоһур анньынар, чаҕылхай киһилэрэ суох. Ол да буоллар, ньыгыллар бэйэлэрин киһилэрин таһаарарга эрэллээхтэр. Евгений Федоров киин быыбардыыр хамыыһыйаны таах салайа барбатаҕа биллэр. Ол эрээри, бу буолан ааспыт үс күннээх быыбардар төттөрүнү этэллэр – былаас баартыйатын кыаҕа көрөн турдахпытына ууллар. 3-4 бырыһыан эрэ арыттаах кыайыы – ситиһии буолбатах. Дьиҥэ, биһиэхэ дьиҥнээх оппозиция диэн уруккуттан да суох этэ, билигин да суох. Норуот итэҕэйбэт маассатыттан аҕыйах кириитик баар уонна бэйэтэ туспа көрүүлээх, санаалаах дьон.

Өссө биир баар. Ол – билигин былаас тоҕо Ил Түмэни уларыта сатыырын кытары сибээстээх. Тоҕо парламент хаачыстыбатын намтата, аппаратын аччаталлар? Биллэн турар, биир мандаттаах уокуруктан норуот бэрэстэбиитэлэ баар буоларын уруйдуохха эрэ сөп. Ол эрээри, бу уларыта тутууга баартыйа испииһэгиттэн дьокутааттар ахсааннарын 35-тэн 12-гэ дылы аччата сатыыллара туохха наадалааҕый?

Степан Дмитриев, Балаҕаннаах нэһ. баһылыга, Үөһээ Бүлүү улууһа:

-- Тыа сириттэн тиийэн олохсуйан олорор , саха дьоно барахсаттар Ил Дархан Айсен Сергеевич Николаевы өйөөн , кини өйүүр хандьыдаатын – Евгений Григорьевы киин куораппыт баһылыгынан талылларыгар сүдү кылааты киллэрдилэр. Тыа дьоно барахсаттар судургу , көнө майгылаахтар .Тыа сирин кыһалҕатын , эриирин - мускуурун билбит дьоннор. Куоракка да кэлэн олохсуйан, дойдуларын кытта сибээстэрин быспаттар . Дойдуларыттан ас - үөл тиийэ турар, сайын оттоһо, сир астыы кэлэллэр .

Ил Дархан Айсен Сергеевич 2021 сылтан урукку өттүгэр хаһан да көрүллэбэтэх, оннооҕор билинҥини кытта тэҥнээтэххэ, ынах сүөһү быдан элбэх кэмигэр көрүллүбэтэх , 4 миллиард солкуобайы тыа сирин сайдыытыгар көрбүтүн уонна тыа дьонун сиэптэригэр харчы быһа тиийиэхтээх диэн, бар дьонун истиитигэр эппититин , эрэннэрбитин толордо! Ил Дархан тэрээһиннээх хаһаайыстыбалар туттарар үүттэрин 1 киилэтин 50 солкуобайга , кэтэх ыал ыанар ынаҕын төбөтүгэр 35 тыһыынча субсидия биэрбитин тыа дьоно өйөөбүттэрин таһынан, махталлара муҥура суох.

Евгений Григорьевы устудьуон аймах эмиэ күүскэ өйөөтө. Оттон кинилэр ортолоругар эмиэ тыа нэһилиэктэриттэн үөрэнэ, өрөспүүбүлүкэ, дойдубут кэскилин, инники олоҕун түстүү , түөрэх уура тиийбит ыччаттарбыт элбэхтэр.

Ил Дархан Айсен Сергеевич уонна куорат мээрэ Евгений Григорьев саха сирин социальнай - экономиичэскэй сайдыытыгар биир өйүнэн-санааннан күүстээх үлэни-хамнаһы ыыталларыгар эрэлбит улахан.

Матвей Евсеев, Ил Түмэн дьокутаата, “Арктик Капитал” генеральнай дириэктэрэ:

— Мин куорат олохтоохторо Евгений Григорьевка итэҕэйбиттэриттэн астынным. Кини куорат сайдыытыгар чопчу былааннааҕынан, ону дьиҥ чахчы олоххо киллиэриэххэ сөптөөҕүнэн астыннарар. Барыта саас сааһынан, ылы-чып, чопчу уонна ситиһиллэр кыахтаах былааннар. Маны таһынан, кини хамаанданы үлэлэтэргэ кыахтаах, биир санаалаахтарын сатабыллаахтык түмэ тардар киһи. Куорат кыһалҕатах олус элбэх. Ону кини күүскэ ылсан туоратарга бэлэмнээҕинэн итэҕэтэр. Барытын ымпыгар-чымпыгар дылы аахпыт – төһө үп наадатын, төһө бириэмэ ирдэнэрин... Онон куорат олохтоохторо Дьокуускай туһугар чахчы үлэлиир хаһаайын кэлбитин өссө да билэн-көрөн иһиэхпит. Кини туруоруммут сыалын ситиһиэ диэн эрэнэбин. Евгений Григорьев курдук ыччаттардаахпытыттан баартыйа имиджэ уларыйыа.

Тарҕат:

Добавить комментарий