Киирии

Киирии

Ил Түмэн дьокутааттара ааспыт сыллааҕы дохуоттарын уонна хамсаабат баайдарын-дуолларын туһунан отчуоттаабыттар. Мэлдьи буоларын да курдук, саамай баай дьокутаатынан экэниэмикэ, инвестиция уонна бырамыысыланнас бэлиитикэтин, урбаан, туризм уонна инфраструктураны сайыннарыы сис кэмитиэтин бэрэссэдээтэлэ Виктор Федоров буолбут.

Виктор Федоров сыллааҕы дохуота – 104 мөл. 213,5 тыһ. солк. Быйыл Федоров дохуота балачча түспүт. 2015 сыллаахха кини сыллааҕы дохуота 136,8 мөл. солк. этэ, оттон 2016 сыллаахха – 114,1 мөл. солк. Кириисис тыына киниэхэ да биллэр быһыылаах.

Иккискэ Сергей Краснов иһэр. Кини былырыын 41 мөл. 261 тыһ. солк. өлөрбүт. Краснов Ил Түмэҥҥэ былырыын ыам ыйыттан кэлбитэ. Инньэ гынан, кини баайа-дуола хамсыырын этэр уустук. Сергей Краснов “Олекминское грузовое автотранспортное предприятие” ХЭУо дириэктэринэн үлэлиир.

“Арктик Капитал” ХЭУо дириэктэрдэрин Сэбиэтин бэрэссэдээтэлэ Иван Андреев былырыын 41 мөл. солк. өлөрөн үһүс миэстэҕэ тахсыбыт. Кини 2016 сыллаахха 35,5 мөл.солк. харчыласпыт этэ.

Былырыыҥҥы рейтиҥҥэ иккис испит ЛДПР Саха сиринээҕи салайааччыта Гаврил Парахин икки миэстэнэн таҥнары курулаата. Кини быйыл 37 мөл. 482 тыһ. солк. өлөрбүт, ити 2016 сыллааҕы дохуотуттан 44 мөл. кыра. 2015 сыллаахха Парахин 32 мөл. солк. аахсыбыт.

Биэс саамай баай дьокутааттар испииһэктэрин Бүлүү улууһуттан норуот дьокутаата Юрий Окоемов түмүктүүр. Кини былырыын 31 мөл. 391 тыһ. солк. дохуоттаммыт. Ити былырыыҥҥыга холоотоххо икки мөл. солк. кыра.

Оттон саамай кыра дохуоттаах дьокутаат – Ирина Енторова. Уус Майда училищетын дириэктэрэ, норуот дьокутаата “баара-суоҕа” 180 тыһ. солк. дохуоттаах. Хомуньуус Алина Винокурова 467 тыһ. солк. дохуоттаммыт. “Ньыгыл” дьокутаата, “Капстпойснаб” ХЭУо генеральнай дириэктэрэ Михаил Ягнышев 462 тыһ. солк. дохуоттаммыт. Оттон КПРФ Саха сиринээҕи рескомун сэкэритээрэ Петр Аммосов былырыын 504 тыһ. солк. өлөрбүт. Урбаанньыт, уопсастыбанньык Владимир Федоров сыллааҕы дохуота 618 тыһ. солк.

Ил Түмэн спикерэ Александр Жирков былырыын 5 мөл. 912 тыһ. солк. дохуоту аахсыбыт.

Тарҕат:

Ырытыыгын суруй

Защитный код
Обновить

Бүтэһик сонуннар